Olje- og energiminister Ola Borten Moe vil ikkje gje ei einaste krone i kompensasjon for inngrepa som blir gjort i samband med bygging av den nye 420 kilovolts kraftlinja mellom Fardal og Ørskog.
Til samanlikning: I Hardanger hosta regjeringa opp 100 millionar.
– Eg vil understreke at Hardanger var eit eingongstilfelle. Eg kjem ikkje til å leggje til rette for ein repetisjon, seier Borten Moe til Bergens Tidende.
- LES OGSÅ:
– Uhøyrt å ikkje behandle likt
Energistatsråden var tysdag på synfaring i helikopter over områda som kan få den gigantiske kraftlinja.
Tilbake på bakken møtte han ordførarane i Naustdal, Flora, Førde og Jølster.
– Vår natur er like mykje verd. Regjeringa må behandle oss på lik linje - noko anna vil vere uhøyrt, seier Flora-ordførar Bente Frøyen Steindal til avisa.
- LES OGSÅ:
– Kommunane i Sogn og Fjordane må forstå at dette toget går no, og at dei ikkje lenger skal finne seg i å bli hersa med på denne måten, seier ho.
(Artikkelen held fram under biletet)
Vil ikkje utfordre Sp-kollegaen
Den nye 420 kilovolts kraftlinja er planlagd mellom Fardal i Sogn til Ørskog på Sunnmøre. Mastene vil bli mellom 15 og 45 meter høge.
Linja vil føre med seg store naturinngrep, men skal sikre krafttilgang for Sunnmøre - samstundes som kraft frå Sogn og Fjordane kjem på nettet.
- LES OGSÅ:
Senterpartiets ordførarar i Førde og Jølster, Nils Gjerland og Gerd Dvergsdal, er ifølgje Firda ikkje innstilte på å utfordre partifellen som sit med makta i olje- og energidepartementet.
– I motsetnad til kommunane i Hardanger, har vi delteke i prosessen, og vi blir lytta til. Linja har også ein nytteverdi for oss, sjølv om ei slik kraftlinje alltid vil gå ut over nokon, seier dei til avisa.
- Ei stor misoppfatting
- Hardanger-kommunane er ikkje lova 100 millionar til eit næringsfond, men til avbøtande tiltak, seier statssekretær Eli Blakstad i olje- og energidepartementet.
Statssekretæren avviser med dette at regjeringa forskjellsbehandlar.
- Dei 100 millionane Hardanger får er ikkje kompensasjon, men pengar som skal gå til avbøtande tiltak i dei ulike kommunane. Det er ikkje heimel i lova for å gje kompensasjon når me byggjer denne typen infrastruktur, seier Blakstad.
Statssekretæren lovar at også kommunane her i fylket skal få pengar til avbøtande tiltak.