Ministeren vil ha skifte av fokus

Kulturministeren besøkte denne helga countryfestivalen på Breim i samband med avgjersla om kva countryfestival som skal få status som knutepunktfestival.

Fleire har kritisert countryfestivalane for å berre dreia seg om fest og flatfyll, og ikkje musikken.

• Sjå bileta frå årets countrytreff på Breim her

– Like gale andre stader

Kritikken mot countryfestivalane har den siste tida våre stor. Kulturkommentator i Aftenposten og forfattar Vidar Kvalshaug uttalte at publikum er meir opptekne av fest og campingliv, enn av musikken, og at ingen countryfestivalar fortener knutepunktstatus.

• Les óg: – Trist med så mye rus på festival

Kulturministeren er no lei av kritikken og at countrymusikk og countryfestivalar blir assosiert med fest og flatfyll.

– Eg har vore på mange festivalar, og det er like mykje fyll på alle saman. På andre festivalar må eg ikkje svara på vegner av heile musikksjangeren og festivalen om ein eller annan person som ligg full i ei grøft, men det må eg på ein countryfestival. Det er eg lei av å måtte gjera, seier Huitfeldt.

– Skift fokus

– Eg har fått eit veldig godt inntrykk av både denne og fleire countryfestivalar. Det er skrive nok om fyll i samband med desse festivalane, no vil eg ha fokus på alle dei flotta folka her. Det går føre seg so fantastisk mykje bra på scena, og det frivillige arbeidet rundt er like fantastisk, seier ministeren.

(Artikkelen held fram under reportasjen)

Huitfeldt er lei av at countrymusikken ikkje blir anerkjend på same måte som andre musikksjangrar.

– No er det på tide at musikkjournalistar kjem seg på countryfestivalar og melder det som skjer på scena på lik linje med andre musikksjangrar i Noreg. Det går føre seg so mykje spennande i countrysjangeren og det er so mange flotte norske countryartistar.

– Det er på tide at country får same anerkjenning som andre sjangrar, seier Huitfeldt

Presentert i statsbudsjettet

Det er countryfestivalen på Seljord og Country Music festival på Vinstra og Norsk Countrytreff på Breim som kjempar om å få status som knutepunktfestival. Med den statusen kjem rolla som ein leiande festival innan country i Noreg, og statusen gir statlege overføringar over statsbudsjettet.

• Les óg: Countrytreff kan få statsstøtte

– Det me legg vekt på er søknaden og ambisjonane om å vera ein knutepunktfestival. Den festivalen som får støtte vil bli eit kompetansesenter for andre festivalar, og må då kunne overføra sin eigen kompetanse til dei andre, seier ministeren.

Avgjersla blir presentert i statsbudsjettet for 2012.