Reven vart observert i Lærdalstunnelen i morgontimane onsdag. Fjellreven er utryddingstruga og 15. desember vart 26 fjellrevar frå tre ulike kull sleppt ut på Finse.
- Det truleg ein av desse som har somla seg ned i bygda her og inn i tunnelen. Den er no ute, og er ein eller annan stad i Aurland, seier Rein Arne Golf, oppsynsmann i Statens Naturoppsyn.
(Saka held fram under TV-saka)
EIN AV DESSE? 26 revar vart før jul sett ut på Finse. No kan ein av dei ha forvilla seg til Aurland.
Ta bilete
Oppsynet ynskjer opplysningar som gjer at dei kan fange og føre reven attende til fjellheimen.
- Dersom nokon ser den, så er fjellrevane plastikkmerka i øyrene med ulike fargekodar. Vi håpar nokon kan fortelje oss kva fargekode den har og eventuelt ta bilete av den, seier Golf.
Ingen fare
Oppsynsmannen presiserer at det ikkje er farleg med ein fjellrev tuslande rundt i nabolaget. Det er for revens eigen del at dei vil plassere han opp att i fjellet.
- Det er der vi ynskjer han skal vere. Eg har spora den i byggefelt der han har ete restavfall. Finn den mat så kan den fort bli gåande. Det ynskjer vi ikkje, seier han.
- Han vil nok klare seg, men det er både biltrafikk og konkurranse mellom raudrev og fjellrev, minner Golf om.