Prioriterer framleis ikkje bilane

Dette skjer trass i at samferdsleministeren i starten av juli endra forskrifta midlertidig, med intensjonen at personbilane skulle kunne prioriterast i sommarferien.

– Uklart korleis det skal tolkast

Men administrerande direktør Stig Kristoffersen i Fjord1 Fylkesbaatane seier dei ikkje vil endre praksisen sin før dei får ei rettleiing frå Vegdirektoratet.

– Desse nye retningslinjene er jo ei utfordring. Det hjelper jo ikkje på ferieaviklinga eller ferietrafikken, fordi det er veldig uklart korleis dette skal tolkast. Då må ferietrafikken avviklast med gamle retningslinjer.

• LES OGSÅ: - Ferjekapteinane må på skulen

Skaper lange køar

Når lastebilar med farleg gods tek ferje, får berre eit avgrensa tal passasjerar vere med på same tur. Det har lenge skapt store køproblem for ferjetrafikken langs kysten.

2. juli endra difor samferdsleministeren forskrifta. Før har lastebilar med farleg gods fått plass på ferja i den rekkefølgja dei kom til kaia. No skal kvar enkelt kaptein få bestemme om farleg last må vike for å skape flyt i personbiltrafikken, spesielt i sommarferien.

• LES OGSÅ: Farleg last må vike på ferjene

– Venta meir kjøt på beinet

Men før Fjord1 endrar praksis, vil dei ha felles retningslinjer på plass. Kristoffersen seier dei ikkje er klare før etter sommaren.

– Vi hadde forventa litt meir kjøtt på beinet i form av ei rettleiing på korleis vi skal forstå dette. Kundane rundt om i landet må verte likt behandla.

• LES OGSÅ: Lastebilsjåførar og ferjekapteinar reagerer

Ber om innspel

Seniorrådgjevar Odd Barstad i Vegdirektoratet seier erfaringar med den nye praksisen skal gje grunnlag for retningslinjene

– Vi har vore i kontakt med reiarlaga sitt landsforbund og bede om å få nokre innspel til korleis rettleiinga kan utformast, før vi lagar ei rettleiing.

– Moglegheit, ikkje pålegg

Fjord1 som trafikkerer dei største ferjesambanda langs E39 vil derimot ikkje kunne bidra med slike erfaringar, fordi dei ikkje har endra praksis.

– Det er jo litt uheldig at det ikkje vert praktisert, seier Barstad.

– Vil vegdirektoratet gripe inn?

– Nei. Forskriften er formulert som ein moglegheit ferjekaptein eller mannskap har, ikkje som eit pålegg. Slik at eg kan ikkje sjå at vi har nokon grunn til å gripe inn.

Tide Sjø opplyser at dei praktiserer den nye forskrifta med å la kapteinane bestemme.