TOTALVRAK: Personbilen, ein Toyota Auris av nyare dato, fekk hard medfart på veg ned den bratte skråningen.
Foto: Bjarne Eldevik / NRK
SKARP SVING: Her bar det utfor kanten.
Foto: Bjarne Eldevik / NRK
LANDA ATTMED VEG: Til alt hell kom folk raskt til frå husa like ved.
Foto: Bjarne Eldevik / NRK– Bilen har kome køyrande frå Vågsøy i retning Selje. I ein krapp sving har det bore rett utfor ein skrent, opplyser politibetjent Roger Gundersen til NRK Sogn og Fjordane på ulykkesstaden.
Personbilen landa om lag 30 meter nedanfor hovudvegen og har gått kast i kast før den la seg til ro like ved ein lokal veg som går til eit hytteområde.
– Kvinna som var aleine klarte å ta seg ut av bilen på eigahand, opplyser Gundersen.
Då hjelpemannskapa kom tid staden var den kvinnelege sjåføren teken hand om av folk som hadde vore vitne til ulykka.
– Heldigvis har krattet i skråningen teke av litt for støyten på bilen si ferd ned skråningen, seier Gundersen.
Ulykka skjedde like før klokka 16, på fylkesveg 618 ved Seljeneset om lag ein kilometer forbi Flatraket i retning Selje.
Klokka 21 søndag kveld opplyser AMK-sentralen i Førde at biføraren, ei 61 år gammal kvinne, har moderate skader etter ulykka. Kvinna får intensivbehandling ved Førde sentralsjukehus.