Skredfare vart til skogbrannfare

Regnet har hølja ned over store delar av Vestlandet den siste tida. Førre veke vart det sendt ut flaumvarsel, og kommunane har hatt hendene fulle med å halde dei store vassmengdene i sjakk.

– Huff da

Det vekte difor stor forundring at statsmeteorolog Arlid Mentzoni i går kveld åtvara mot skogbrannfare på vestlandet.

• SJÅ VÊRMELDINGA PÅ NETT-TV

«Det er framleis stor skogbrannfare», sa meteorologen og peika på eit vêrkart dekka av regntunge skyer.

– Gjorde eg det? Huff da, eg meinte sjølvsagt snøskredfare. Det kan gå litt i surr når ein står og snakkar slik, ler Mentzoni.

Ingen aprilsnarr

At meldinga var ein litt tidleg aprilsnarr, vil han ikkje vedgå.

– Nei, eg tullar ikkje med slikt. Snøskredfare blei til skogbrannfare. Det var ei rein forsnakking, rett og slett, seier han.

Skogeigarane i Sogn og Fjordane treng med andre ord ikkje frykte for trea sine -ennå.

– Nei, skogbrannfare får me vente med å tenkje på til lenger ut på våren, humrar statsmeteorologen.