Medaljedryss over Nordfjord

I Alta vart det eitt gull, to sølv og ei bronsemedalje under det som blir reikna som NM for 15- og 16-åringar.

- Det var snakk om at dette var den beste dagen klubben har gjort, seier juniorrekrutt-trenar Svein Lasse Bødal.

Hard klasse

Overbyggingsklubben i Nordfjord har eksistert i nær 20 år, og aldri før har den opplevd ein slik dag på eit Hovudlandsrenn. I klassa for gutar 16 år vart det dobbeltsiger med John Eirik Meland (Markane) på førsteplass, med Vebjørn Hjelle (Stårheim) på sølvplass.

- Dette er ein bra prestasjon. Gutar 16 år er rekna som den hardaste klassa, seier Bødal.

Seks blant dei ti beste

I tilleg vart Isak Flo Bødal (Stårheim) nummer to i gutane si 15-årsklasse og Helene Støve Otterdal (hornindal) nummer tre i den eldste jenteklassa. Med seks utøvarar blant dei ti beste, er Bødal svært nøgd.

- Vi er veldig godt nøgde ut frå den samla innsatsen, seier Bødal.

Kan bli meir

Og meir medaljar kan det bli. Laurdag er det sprint, medan meisterskapen blir avslutta søndag med stafett.

- Vi har utøvarar som har hevda seg godt jamt over, og vonar at det held fram. Skiskyting er ein spanande sport der det er umogleg å vite kven som står på pallen når siste løpar er komen i mål.

- Ser ein på gutelaget søndag, så er fjerdeplass dårlegast blant våre fire beste, legg han til.

Samarbeider godt

Også Synnylven er med i samarbeidsklubben, men dei har ingen utøvarar på hovudlandsrennet. Totalt er det nær 30 aktive i Team Statkraft Nordfjord. Og innsatsen fredag viser at det gror godt i rekkene bak Ronny Hafsås og Tarjei Bø.

- Vi samarbeider godt mellom klubbane og plukkar dei beste elementa frå kvar klubb. Dette sveiser vi saman til eit team.

Ved ein feil i den opprinnelege sak vart feil trenar sitert, men dette er no retta opp.