-Fryktar at gassen er giftig

Den siste månaden har stanken av kloakk og råtne egg vore nesten uthaldeleg for folk i Askvoll sentrum.

• LES OGSÅ: - Det luktar råtne egg og kloakk

Fryktar at gassen er giftig

Det er stank frå vassbassenget Kyllaren som fører til den svært ubehagelege lukta. Men no er det ikkje berre sentrumsbuarane som må leve i stanken. Folk heilt ut på Værlandet har byrja å kjenne lukta.

Fleire har frykta at gassen kan vere giftig.

Folk er kvalme og svir i auga

Kommunelege Johan Nyhammer seier gassen er giftig i svært store konsentrasjonar. Men tilbakemeldingane frå Folkehelseinstituttet er at eit utslepp frå naturen i fri luft, ikkje kan gje så høge konsentrasjonar at det medfører helseskade.

- Mange folk er plaga av dette. Dei er plaga av kvalme, hovudverk og mange svir i auga, seier legen.

Det er spesielt auga, nasen og munn som vert råka ifølgje legen.

- Problemet er uuthaldeleg, seier kommunelegen.

Måtte halde seg for nasen

Kommunen har no teke kontakt med fylkesmannen si miljøvernavdeling for å høyre kva som kan gjerast.

Reporter Anna Gytri frå NRK Sogn og Fjordane er i Askvoll i dag, og fortel at både ho og fotografen som er med på turen måtte halde seg for nasen då dei gjekk ut av bilen.

- Vi kjendte lukta då vi nærma oss Askvoll. Men då vi kom fram var det så ille lukt at vi måtte halde oss for nasen, seier Gytri.