Sette Navarsete på "miljøgrillen"

Senterpartileiar, og kommunal- og regionalminister, Liv Signe Navarsete vart stilt til veggs under Natur og Ungdom sitt 46. landsmøte som starta i Fredrikstad torsdag. Kring 200 unge miljøaktivistar frå heile landet deltek.

- På ein skala frå ein til ti? Sju-åtte. Ho svara ikkje at ho var for rutilutvinninga, så eg kan ikkje seie ti, seier Inger Fure Grøtting, leiaren i Natur og Ungdom i Sogn og Fjordane.

- Dårlege svar

Fure Grøtting utfordra Navarsete på rutilutvinningssaka i Naustdal. Mellom anna kva synspunkt partileiaren har i saka, og kva Senterpartiet vil gjere med den når den kjem i regjeringa.

- Men svara vart ikkje heilt som venta, fortel fylkesleiaren og fortel at Navarsete ikkje ville gje noko svar før saka kom opp i regjeringa. I Naustdal støttar Senterpartiet planane.

Burde hatt meining

- Eg skjønar at det er vanskeleg for henne å ta standpunkt i alle saker, og eg ventar ikkje at ho skal kjenne til alle politiske saker i fylket. Men dette er kanskje den viktigaste saka, så kanskje ho burde hatt ei meining om det, meiner Fure Grøtting.

- Det var hyggeleg at Navarsete stilte opp på utspørjinga, og at eg fekk stille ho sprøsmål om den viktigaste saka frå fylket vi begge kjem frå. Likevel er eg skuffa over dårlege svar, seier Fure Grøtting og krev politisk handling.

- Krev rein fjord

Nordic Mining har søkt om løyve til å utvinne rutil i Engebøfjellet, og ventar no svar frå SFT. Planane vil gje arbeidsplassar, men er omstridde og har vekt sterke reaksjonar lokalt. Mange fryktar at eit fjorddeponi vil øydeleggje Førdefjorden og livet i den.

• LES OGSÅ: Held fast på fjorddeponi

Natur og Ungdom sitt landsmøte gav klar beskjed til både Regjering og SFT at dei krev ein rein Førdefjord i all framtid.

Det lukkast ikkje NRK å få kommentar frå Liv Signe Navarsete om saka.