Pass på vassrøyra i kulden

For kulda skapar ikkje berre problem for folk som skal ferdast ute. Svært låge temperaturar kan føre til at røyr sprekk og gje store vasslekkasjar.

Kan bli svært dyrt

Og dette kan koste deg dyrt. For vass-skader på røyr kan denne vinteren komme til å koste opp mot 150 millionar kroner. Det viser berekningar frå Sintef Byggforsk.

Mange skrur av varmen i huset når dei reiser vekk og dette kan koste kvar huseigar fleire hundre tusen kroner.

Eigaren sitt ansvar

Det er huseigaren sitt ansvar å passe på eigedommen sin og forsikringsselskapa har blitt strengare blitt strengare viss folk har vore uforsiktige.

- Dei fleste hugsar det, men det er alltid nokre som er uheldige og gløymer det. I kuldeperiodar som vi har no, vil det bli frostskader, seier dagleg leiar Bjørn Olav Øvrebø frå Dale Røyr i Førde.

Omfattande skader

Han seier at dei får ein del ekstraarbeid på grunn av dette.

- Ja, vi må rykkje ut og tette lekkasjar etter at varmen er komme tilbake.

Han seier at vass-skader er så dyre fordi vatn som kjem ut i bygningskonstruksjonen skaper mykje skade og at det fort blir omfattande å reparere.

- Ikkje spar på straumen

Øvrebø har fleire gode råd for å unngå slike skader.

- På denne årstida er det ikkje rett å spare på straumen. Første bod er å halde varmen. Skal du reise vekk så anbefaler vi at du stengjer hovudkranen og får nokon til å sjå etter huset.

- Kva skal folk gjere viss dei er uheldige og skaden har skjedd?

- Dersom vatnet fossar inn er det om å gjere å få stengt hovudkranen og deretter kontakte røyrleggjar og snikkar. Og vi tilrår at dei ringjer forsikringsselskapet og fortel kva som har skjedd.