Er dei verdas beste "sonelag"?

- Det er veldig moro. Vi tek jo snart over heile geskjeften her, ler Roger Aa Djupvik.

Hyaren skal laurdag gå sesongopninga i fri teknikk i verdscupen på Beitostølen. Det skal også Ronny Hafsås frå Stårheim.

Søndag skal Odd-Bjørn Hjelmeset frå Vereide i aksjon på stafetten.

• LES MEIR: Hjelmeset står over verdscupopninga

Krav til sjølvdisiplin

Med trenar Morten Aa Djupvik frå Hyen på sidelinja i tillegg, dominerer nordfjordingane no det norske landslaget i langrenn.

- Eg har ikkje noko godt svar på kvifor det er slik, og kanskje er det litt tilfeldig. Men langrenn er nok ein idrett som krev mykje trening - ofte åleine og med stort krav til sjølvdisiplin. Så kor ein kjem ifrå spelar inga stor rolle. Ein god og jordnær oppvekst er eit bra utgangspunkt uansett kva ein skal drive på med, seier Morten Aa Djupvik.

Har friplass til jul

Medan Odd-Bjørn Hjelmeset er ein gammal travar i landslagsmiljøet, er Roger Aa Djupvik og Ronny Hafsås langt ferskare.

• LES OGSÅ: Trio på rekordungt landslag
• LES OGSÅ: Roger vart vraka av bror sin

Aa Djupvik har sikra seg friplass i verdscupen fram til jul takka vere samanlagtsigeren i den skandinaviske cupen sist sesong. Hafsås satsar framleis knallhardt på skiskyting, men har også fått ein fot i langrennsleiren med sitt store potensial i sporet.

Alle vil til OL

NRK Sogn og Fjordane møtte kvartetten frå Nordfjord berre nokre dagar før alvoret brakar laust på Beitostølen.

Alle fire drøymer om ein plass i den norske troppen til OL i Vancouver. Og det er viktig å posisjonere seg heilt frå første stavtak.

- OL er sjølvsagt det store målet for alle som står her. Og eg trur den moglegheiten er stor. Men det er først no alvoret byrjar, og det er no det er viktig å gjere dei rette tinga framover, seier Morten Aa Djupvik.

DU KAN SJÅ VERDSCUPOPNINGA DIREKTE PÅ WEB-TV HER.