Meiner kampen må bli langsiktig

Alfred Bjørlo er forundra over den defensive strategien til politikarane i Nordfjord. I staden for å ha ein langsiktig strategi for korleis den helsefaglege situasjonen skal sjå ut om ti og 20 år, kjempar dei frå dag til dag.

Striden spissar seg

Måndag gjekk fylkeslege Petter Øgar ut og sa at kampen om akuttilbod på lokalsjukehusa går ut over nye pasientgrupper, som må prioriterast.

LES ÒG: akuttilbod på lokalsjukehusa går ut over nye pasientgrupper

No kjem òg den profilerte Venstre-mannen, samfunnsdebattanten og leiar i Måløy Vekst, Alfred Bjørlo, på banen.

Han rettar kritikk mot Nordfjordrådet og seier at dei må jobbe meir framtidsretta og nytte høvet til å styrke sjukehuset i Nordfjord på fleire felt.

Utnytte pengedryss

Det er to område der Nordfjord har unike høve, meiner Bjørlo. Det eine er psykiatri og det andre er samhandlingsreforma.

Bjørlo undrar seg over at Nordfjord-ordførarane ikkje nyttar lovnadene om pengedryss frå regjeringa til å styrke helsetilbodet i regionen. Dei burde gå saman om å bygge ut helsetenestene, som gjer at dei kjem nærmare innbyggjarane.

Ansvarslause politikarar

Det heile handlar om politisk ansvar, legg Bjørlo til.

– Eg forventar at når ein har vald ordførarar og kommunestyre, så må dei ta grep om det viktigaste offentlege kompetansemiljøet ein har i området.

«Me kan berre slå fast at folk ikkje skjønar godt nok at det er Helse Førde som styrer dette her, og ikkje ordførarane i Nordfjord.»

Gunn Helgesen, ordførar i Selje

«Eg har forståing for at Alfred Bjørlo kanskje ikkje har med seg historia.»

Sonja Edvardsen, ordførar i Eid

Edvardsen peikar på at sjukehuset i Nordfjord har omstilt seg dei siste ti åra og står i dag med eit fullverdig tilbod som lokalsjukehus.