Fleire unge får psykiske problem

- Det er fleire og fleire barn som slit. Det er viktig å ta dette på alvor, seier Frode Thuen.

Han er samlivsterapeut og psykolog, og heldt denne veka foredrag for 120 fagfolk innan helsevesenet under Småbarnsdagane i Førde.

Mange har varige vanskar

Tal frå Folkehelseinstituttet syner at mellom 15 og 20 prosent av alle barn og unge må takle kvardagen med psykiske problem.

• LES MEIR: Status for psykiske lidingar i Norge

Hos om lag halvparten av desse er symptoma så mange eller alvorlege at dei har ein diagnostiserbar psykisk sjukdom.

Hos dei fleste er symptoma forbigåande, men 25 til 40 prosent av barna har problem som varer i mange år.

Konfliktar er øydeleggjande

Særleg utsette er barn av skilde foreldre.

- Konfliktar mellom foreldre i samband med barn, og spesielt i samband med skilsmisse, er veldig øydeleggjande. Så dersom foreldra klarer å finne ut av det med kvarandre, så gjer dei barna ei stor teneste, seier Thuen.

- Viss ikkje, utset dei barna for store utfordringar, og då er det er ein stor risiko for at ting kan gå galt, forklarer psykologen.

- Eit viktig seminar

Det var denne veka eit rekordstort oppmøte på Småbarnsdagane i Førde.

Frode Thuen trur mange fagfolk er opptekne av denne typen seminar.

- Det er tema som mange her opplever i sin kvardag. Dei ser utfordringane hos ungane, og ønskjer difor påfyll. Det er dessutan viktig at yrkesgruppene har felles forståing for utfordringar og moglegheiter, seier Thuen.