Hopp til innhold

DDE toppar Førdefestivalen

Førdefestivalen vil ha folkefest i Førde - hovudattraksjon i år er D.D.E og Vassendgutane.

D.D.E

Førdefestivalen kan love skikkeleg trønder-rock i Førde i juli.

Foto: Bjørnflaten, Thomas / SCANPIX

- Vi ville gå overraskande vegar i jubileumsåret, seier informasjons- og marknadssjef Torill Faleide i Førdefestivalen.

Lovar folkefest

Når festivalprogrammet blir slept seinare i dag, står D.D.E og Vassendgutane øvst på plakaten. Festivalleiinga lover skikkeleg folkefest midt i Førde sentrum.

- No har vi helde på med Førdefestivalen i 20 år, og har halde ein streng profil. Så no ville vi gjere noko som var skikkeleg annleis og treffe veldig breitt.

Ønskje om noko annleis

Vassendgutane

Det blir skikkeleg festcountry når Vassendgutane kjem på Førdefestivalen.

Foto: Bent Ulleland

Førdefestivalen har før om åra fått kritikk for å hatt for smale band og grupper i programmet sitt. Og Faleide innrømmer at dette har påverka bookingarbeidet:

- Vi kan godt lytte til kritikk av og til, men det er mest ønskje om å gjere noko som kan verke uventa og morosamt for å feire at vi er 20 år.

- Dette er langt over streken

Men ved å sette opp D.D.E og Vassendgutane som hovudattraksjon, haustar festivalen kritikk frå andre kantar. Tidlegare fylkesdirektør for kultur, Lidvin Osland, meiner Førdefestivalen går bort frå den tidlegare profilen sin.

- Eg er nok av dei som har ønska at ein skal ha folkeleg profil som ikkje berre er for dei mest avanserte, men dette er å gå langt over streken. Dette skuffar meg.

Gratis billettar

Faleide meiner likevel det viktigaste er å skape ein real folkefest, og kan lokke med ein ekstra godbit. Dei 25 første som melder seg får fribillettar til festivalen:

- Dei som tek kontakt først, får to fribillettar kvar, seier ho.

Her finn du ut korleis du får tak i gratis billettar