- Uaktuelt med vindmøller

Miljøvernavdelinga seier nei til dei tre omsøkte vindmølleprosjekta i fylket.

Heilt uaktuelt

- Landskapet på Stad er unikt i norsk samanheng, og ei utbyggjing vil ha stor innverknad på landskapet. I tillegg vil det vere dårleg å gjere dette i eit miljøperspektiv, meiner fylkesmiljøvernsjef Nils Erling Yndesdal

Men dei store energiselskapa står i kø for å satse på vindmølleparkar i Sogn og Fjordane. Fylket er peika ut som det området i landet med størst potensiale for vindmøller og styresmaktene vil ha meir grøn energi.

Nei, nei, nei

Men Fylkesmannen i Sogn og Fjordane er negativ og har i eit høyringsvar til NVE altså sagt nei til tre prosjekt.

På Setenesfjellet i Gulen vert det nei fordi søknaden er for dårleg, og på Ytre Sula i Solund fordi landskapet er flatt, og fordi det fins havørn, hubro og vandrefalk.

- Ytre Sula er eit utsett området, poengterer Yndesdal.

Fylkesmannen seier også dette er eit klart signal om at ein ikkje vil ha vindmøller på Ytre Sula der store energiselskap har lansert svært store planar om opptil 75 vindmøller.

Generelt negativ

Administerande direktør i Vestavind kraft Håkon Sandvik meiner Fylkesmanen er generelt negativ til vindmøller.

Han har fått nei til sin søknad om å bygge vindmøller på Stad.

- Vil føler fylkesmannen meiner vindkraft er ein trugsel, og det er synd for det må vere mogleg å utnytte naturressursar og samstundes ta vare på landksapet, seier han.

Sandvik seier dette ikkje er i tråd med signala frå regjeinga om å satse meir på grøn energi.

Må ha tolmod

Fylkesmannen seier dei har fått med seg signala om å satse på meir grøn energi, men frårår at det vert bygd fleire vindmøller her i fylket før ein er samde om fylkesdelplanen for vindkraft.

Og det kan bety at mange utbyggarar må vente på svar til eit godt stykke ut i 2010. Planen vil truleg verte heilt avgjerande for kor det kjem vindkraft i Sogn og Fjordane.