Kommunar med sterke vennskapsband til palestinske kommunar, er djupt uroa for utviklinga i Gaza. Dei har no skrive brev til Israel sin ambassade i Oslo
.- Vi har sett og blir opprørte over tilstande på Gaza som er eit resultat av den aggressive krigføringa som staten Israel fører over palestinarane der, seier ordførar i Lærdal, Arne Sanden.
Starta i Lærdal
Det er vennskapslaget i Lærdal som har teke initiativ til brevet. Dei har fått med seg ordførarane i Tromsø, Sarpsborg, Trondheim, Hamar og Stavanger i brevet.
- På vegner av folket i kommunane våre ber vi på det sterkaste Israel om å stogge krigen og la humanitære organisasjonar få kome inn i Gaza, i tråd med Genevekonvesjonen og humanitære lover og reglar, skriv dei.
Kan ikkje forsvarast
Vidare skriv ordførarane at dei respekterer den israelske regjeringa sin rett og plikt til å forsvare borgarane sine.
- Men konsekvensane av aksjonane mot Gaza den siste tida, kan ikkje på nokon måte forsvarast. Slik valdsbruk vil aldri føre til fred og tryggleik, verken for det israelske eller for det palestinske folket i regionen.
- Stogg krigshandlingane
Ordførarane er uroa for den humanitære situasjonen i Gaza. Fleire sivile er drepne og skular, moskear og andre sosiale institusjonar er lagt i ruinar. Situasjonen vedkjem også vennskapskommunane deira i Norge, skriv dei.
- Vi oppmodar difor Israel på det sterkaste om straks å stogge krigshandlingane, forlate Gaza og opne grensene for humanitær hjelp, medisin og mat, slik at det kan bli mogleg å byggje ei ny framtid i landet.
- Skaper humanitære problem
Ordførar i Sanden i Lærdal vil ikkje hevde at dei tek stilling til konflikten som har oppstått i Israel. Den vesle kommunen inst i Sogn har Jeriko som vennskapsby.
- Vi tek stilling til at krig ikkje løyser noko problem, heller ikkje i denne samband. Derimot skaper ein mange humanitære problem. Det er det vi reagerer på no. Det er grufult å sjå kvinner og barn gå gjennom slike lidingar, seier han.
- Det nyttar
Sanden er viss på at det nyttar å engasjere seg i saka. Totalt har 650 menneskeliv gått tapt, medan 2 900 personar er skadde. Av dei omkomne er 210 barn og 90 kvinner.
- Det einaste som hjelp er å bry seg. Det gjer vi. Eg trur at sterkt press frå alle kantar av verda også har verknad på dei som styrer i Israel og regjeringa. Eg er sikker på at det nyttar, seier han.
Denne artikkelen er no sperra for kommentering. NRK takkar for innlegga.