Nominert til årets kokebok

Det er Apéritif og Norli som står bak kåringa. Av 31 påmelde kokebøker i konkurransen, plukka juryen ut fem finalistar. Mellom desse boka til sunnfjordingen, 'Gourmet for folket'.

- Det er sjølvsagt veldig hyggeleg, men det er mange sterke konkurrentar. Eg trur det blir vanskeleg å nå heilt opp, seier Eikefjord.

Ole Jonny Eikefjord

Foto: Falch, Knut/SCANPIX

• Fødd 1970
• Starta kokkekarriera si på Sunnfjord hotell der han gjekk gradene frå lærling til kjøkkensjef.
• Vart kjøkkensjef på Hotel Continental i Oslo, der han vart "oppdaga" av Petter Stordalen. Saman starta dei Restaurant Eik.
• I kjølvatnet av Restaurant Eik, starta dei også opp Eik Annen Etage og fiskerestauranten Fjord.
• Alle restaurantar får strålande kritikkar.
• Kjelde: Det Norske Samlaget

Trur på Stiansen

Sjølv meiner Eikefjord at Bent Stiansen er ein sterk kandidat til å stikke av med prisen når den blir delt ut 14. november. Stiansen var den første skandinav til å vinne gull i det prestisjefylte Bocuse D'or. Meisterkokken har gjeve ut fleire bøker. Han er nominert for boka "Stiansen inviterer til fest".

- Fleire av finalistane er meir etablert på bokfronten enn meg. Boka til Stiansen er kanskje litt meir tradisjonell enn mi. I alle fall utsjånadmessig, seier Eikefjord.

Fekk pris i fjor

Debutboka til Eikefjord kom ut i 7.000 eksemplar og er snart utseld. Om det kjem fleire bokprosjekt frå sunnfjordingen, er uvisst.

- No skal ein aldri seie aldri, men det blir i alle høve ikkje noko ny bok neste år. Akkurat no er eg berre glad for å vere ferdig med den første, seier han. Om prisen hamnar i hendene til Eikefjord, så er det ikkje første gang det vankar pris til han. I fjor røysta publikum fram Restaurant Eik som den beste restauranten i 2006.