Fem alpinanlegg med felles skipass

Skikortet Alpepass gjer tilgang til Stryn skisenter og Harpefossen skisenter i Eid pluss tre anlegg på Sunnmøre.

- Vi er veldig stolte over at vi har fått til dette og vi har store forventningar, seier dagleg leiar Frode Briksdal ved Stryn skisenter.

Vende seg mot nord

Ordninga inneber at viss du kjøper skipass ein stad, så kan du bruke det på Harpefossen, i Stryn, på Stranda, Fjellsetra og i Stordal.

- Så gjer vi ei intern avrekning i etterkant, seier Briksdal.

Det har lenge vore arbeidd med å få til eit felles skikort for Sogn og Fjordane, men det lukkast ikkje å få dette klart til vintersesongen i år. Dermed vende Stryn og Harpefossen seg mot nabofylket i nord.

- Dette er eit nytt opplegg som var på tankestadiet i mange år på Møre-sida. Vi i Nordfjord spurde om å få vere med på dette fordi vi føler oss nært tilknytta dei anlegga.

- Vil gi oss ein peikepinn

Men sjølv om Alpepasset no er på plass i Nordfjord og Sunnmøre, blir ikkje tanken om eit felles skikort for Sogn og Fjordane skrinlagt.

- Det prosjektet held fram. Grunnen til at det ikkje kjem i sving frå komande vinter, var at vi vart oppmoda om å lage eit større og grundigare forprosjekt, seier dagleg leiar for Jølster Skisenter, Stig Tveit.

- Vil passet som har kome på plass bety noko for utviklinga av dykkar prosjekt?

- Nei, den prosessen går vidare sånn som den var tenkt. Det som skjer på Nordfjord og Sunnmøre tykkjer eg er interessant, og vil gi oss ein peikepinn på kor attraktive slike løysingar er.

Ser lyst på sesongen

Med felles skipass er håpet å dra fleire gjesta til skianlegga, og med Alpepasset i drift alt frå sesongstart, ser Frode Briksdal lyst på komande sesong.

- Vi ser veldig positivt på dette samarbeidet.