LES OGSÅ:
Fylkesmannen har oppheva vedtaket.
Ulovleg bruk av pengar
Det var bystyrerepresentantane Bente Halvorsen (SV), Audun Hammerseth (Frp) og varaordførar Elisabeth Normann (V) som bad Fylkesmannen om å vurdere tilskotet.
- Fylkesmannen har konkludert med at Flora bystyre sitt vedtak om å nytte 5 millionar kroner av forventa ekstraordinært utbyte frå SFE som tilskot til Flora Idrettssenter AS var ulovleg, skriv Fylkesmannen på sine sider.
- Har nok å bruke pengane på
Ordførar Bente Frøyen Steindal er ikkje tilgjengeleg for kommentarar til saka. Varaordførar Normann er derimot glad for fylkesmannen sitt vedtak.
- No kan vi legge desse ekstra millionane inn i budsjettet. Vi meiner vi bør prioritere lovpålagde oppgåver og å betale ned gjeld, seier Normann. Ho kan ikkje svare på kva konsekvensar vedtaket får for finansieringa av idrettssenteret, men vedgår at det ligg i korta at det blir vanskeleg å få økonomien på plass på senteret.
- Har is i magen
Styreleiar i Florø idrettssenter, Trond Hansen, vil ikkje spekulere i kva konsekvensar om tilskotet må trekkast attende.
- Det eg kan seie er at saka ikkje er ferdig. Når inntektene frå SFE vert bokført i kommunen, så kjem saka opp på nytt. Det er slik eg tolkar vedtaket. Så vi har is i magen og vil sove godt dei neste vekene, seier Hansen.
Godkjent budsjett
Flora står i ROBEK-registerert og er dermed lagt under statleg godkjenning og kontroll. Fylkesmannen meiner at kommunen heller bør nytte framtidige inntekter frå til dømes utbyte til nedbetaling av underskot og disponible midlar.
- Kommunen har stramt budsjett og må omprioritere og saldere for nær 50 millionar. Dei har svært høg lånegjeld, ingen frie reservar og store problem med balanse i økonomiplanperioden, seier fylkesmann Oddvar Flæte.