Hoggormen har vakna

- Eg har aldri møtt på hoggorm så tidleg. Hadde dette vore i indre strøk ville det ekstremt spesielt. Når det skjer på kysten vil eg kalle det uvanleg, men ikkje ekstremt uvanleg, seier viltforvaltar Hermund Mjelstad hjå Fylkesmannen i Sogn og Fjordane.

Hoggormen vart observert og fotografert i Solund av Magne Hamre søndag 10. februar der den låg og koste seg i det ormen sjølv sikkert oppfatta som vårsol.

- Dette er i alle fall eit garantert teikn på at det har vore mildt på kysten i det siste, seier Mjelstad.

- Kjenner dei at det blir varmt vaknar dei og vil ut og sole seg, slik er dei, seier han.

- Men det er ikkje alltid det løner seg å vere først ute. Plutseleg blir det nok kuldegrader att.

- Kva skjer med ormen då?

- Då berre kryp den under ein stein og går i dvale att. Det er ingen fare med den, seier Mjelstad.

Mjelstad legg til at han har høyrt om fleire andre observasjonar av tidlege vårteikn.

- Eg har til og med høyrt prat om at nokon har sett flaggermus. Det er svært sjeldant på denne tida, seier han.