Oppdrettsfisk på rømmen

Ved eit setjefiskanlegg i Arnafjorden i Vik har omlag 1000 smolt rømt. Det skjedde 30. oktober. 

Uheldig

Folk ved anlegget har forsøkt å fange noko av den rømte fisken med garn, men fiskelukka har vore avgrensa, i følge Fylkesmannen i Sogn og Fjordane.

I ei pressemelding skriv dei vidare.

"Fylkesmannen og Fiskeridirektoratet er uroa over at det har rømt fisk, og spesielt sidan dette har skjedd innanfor grensa til nasjonal laksefjord i Sognefjorden. Anlegg som ligg i nasjonale laksefjordar skal ha ekstra fokus på sikring mot rømming. Den rømte fisken var tilpassa sjøvatn og klar til utsetting i matfiskanlegg då den rømte, og kan difor ventast å få ei god overleving i sjøen. Det er grunn til å frykte at ein del av rømlingane vil vandre opp i elvane og gyte når dei vert kjønnsmogne.

Med årviss innblanding av rømt fisk i elvane vil særpreget til storlaksstammene i Sogn kunne forsvinne, og villaksen verte erstatta dels med forvilla oppdrettslaks og dels hybridar (blanding av oppdretta og vill fisk). I Sogn er det fem nasjonale laksevassdrag og fleire andre elvar med storlaks."