- Bør sponse kommunane

Det spenstige utspelet kjem frå høgrepolitikar Janicke Rasmussen i Eid. Ho meiner private bedrifter bør sponse Eid kommune med 40-50 millionar.

Inspirert av fotballverda

- I fotballverda har ein mange private sponsorar som spyttar inn pengar for å fremje idretten. Eg syns det er ein opplagt vinn-vinn-situasjon for kommunane også, seier Rasmussen.

- Næringslivet og kommunen bør inngå sponsoravtalar. Då kan kommunen vere med å profilere bedrifta, samtidig som næringslivet kan yte pengar til kommunekassa. Då kan ein få råd til å bygge ut skular, gangvegar og idrettsanlegg, påpeikar ho vidare.

- Ikkje konkret nok

Ho framhevar vidare at bedriftene må få noko igjen for sponsinga. Bedriftene skal ikkje gjere det berre for å vere snille. Og dagleg leiar ved Moengården på Nordfjordeid, Ivar Moen, er samd.

- Det her er jo så ferskt, at eg har ikkje fått tid til å tygge noko på det endå. Det er klart at dersom vi skal sponse kommunen, så må vi få noko tilbake også. Vi treng eit meir konkret innhald før vi eventuelt kan gå vidare med dette, seier Moen.