Torde ikkje reise på sjukehus

Familien Hatefmokthari har stemna utlendingsnemnda for retten, men det er uklart når saka vert handsama.

Mahmoud Hatefmokthari skada handa stygt under ei arbeidsulykke før utsendingsvedtaket kom. Sidan då har Mahmoud Hatefmokthari, kona og dei to små borna deira levd i kyrkjeasyl på bedehuset i Sogndal. 

For nokre få veker sidan hadde han time på Rikshospitalet for å gjennopplive ei hand der han hadde saga av fem fingrar. Han torde ikkje reise til Oslo i frykt for å bli arrestert og sendt ut av landet.

-Desperat

Tom Salte i støttegruppa for familien Hatefmokthari er opprørt og fortvila over situasjonen til familien:

- Det er nesten ikkje råd å sette seg inn i situasjonen deira. Ein ting er handa hans, ein anna ting er dei mindreårige ungane. Dei har to gutar på ni og elleve som har foreldre som sit regelrett i fengsel. Og dette må ungane sjå på, seier Salte.

Tom Salte konstaterar at familien er fortvila:

- Ein ser det byrjar å bli aukande teikn på desperasjon over situasjonen.

- Har ikkje rett til opphald

Direktør i Utlendingsnemnda Terje Skjeggestad held fast på at familien må forlate landet:

- Saka har vore handsama og avgjort i fire runder. Den har etter at den blei avgjord i to instansar, også vore handsama i eit nemndmøte med lekfolk tilstades med einstemmig resultat, seier Skjeggestad.

Direktøren i Utlendingsnemnda meiner heller ikkje den skada handa er grunn til å få utsett vedtaket om utsending.