- I år har me ventelister til klatrekursa våre. Samstundes opplever me litt mindre påmelding til brekursa enn tidlegare, seier dagleg leiar Ove Gunnar Drageset i verksemda Breoppleving på Sandane.
Drageset trur bygginga av fleire klatreveggar har hatt stor innverknad på interessa for sporten.
- Veggane får fleire til å prøva klatring. Dei er lett tilgjengelege, og ein kan bruka dei heile året.
Må tilpassa
Dei siste fem åra har talet på medlem i Norges klatreforbund auka med over 3 500.
At folk tykkjer det er kjekt å klamra seg til ein fjellvegg, og at dette kanskje går utover interessa for breaktivitetar, har også Den Norske Turistforening erfart.
- I 2006 arrangerte me for første gong fleire klatrekurs enn brekurs, fortel fagansvarleg for fjellsport, Anne-Mari Planke.
Planke helsar klatreboomen velkomen, men ønskjer på langt nær å oppgi satsinga på brevandring.
- Me må tilpassa brekursa, slik at folk held fram med å gå på breane.
Sel mykje klatreutstyr
Dagleg leiar Bjørn Sandsmark hjå Førde Sport stadfestar trenden.
- Me sel færre stegjarn og isøkser til bruk på bre enn det me har gjort tidlegare. Klatreutstyr går det veldig mykje av, seier Sandsmark.