Stor interesse for gründerprosjekt

Prosjektet har som mål å auke og styrke gründerånda til kvinner. Ei av dei som har søkt om å få vere med er Irene Ivin frå Sogndal.

- Noko av det som er mest utfordrande med å drive for seg sjølv er at ein føler at ein "leikar" butikk. Det er veldig mykje å setje seg inn i,  seier ho.

Vil lære meir

I haust starta Ivin opp ballongbedrifta Jubalong i Sogndal. No håper ho å lære meir om det å drive eiga bedrift. 

- Det å kunne få inspirasjon og å vere ein del av eitt fellesskap er viktig. Samstundes kan vi knyte kontaktar i forhold til næringsliv og rådgjevarar, seier ho.

Stor variasjon

Over tjue kvinner har søkt om å få vere med på Huldra-prosjektet. Og det er stor variasjon blant dei som har søkt, seier Synnøve Aabrekk. Ho er dagleg leiar i Nordfjordeid næringshage og ein av initiativtakarane bak prosjektet.

- Det handlar mellom anna om design, matproduksjon, tekniske løysingar og kunst, seier ho.

Ballongartist

Og for dei som har ein god forretningsidé, er det ikkje for seint. Fristen for å søkje om å vere med går først ut måndag.

Målet til Huldra-prosjektet er at fleire kvinner skal gjere som Irene Ivin og starte si eigen bedrift.

- Ballongar er moro! Eg utdannar meg no og håper å bli ballongartist etter å ha teke eksamen i Dublin til hausten, seier Ivin.