Utlendingar reddar Kleven

I løpet av eit par månader kjem verfta opp i tilsaman 800 arbeidarar.

Teknisk sjef ved Kleven Florø, Jan Tore Bøe, seier det ikkje hadde gått om dei skulle ha satsa på den heimlege arbeidsmarknaden.

- Det har med tilgangen på lokal arbeidskraft å gjere. Den er veldig vanskeleg for tida, det er nesten ikkje norske arbeidsfolk å oppdrive, seier han.

500 innleigde

For Kleven er fullbooka ut neste år, og har nye opsjonar i sikte. I løpet av april og mai vil det vera over 500 innleigde på jobb på Kleven i Florø og Førde. Dei fleste kjem frå utlandet. Samstundes vil arbeidsstokken av fast tilsette passera 300.

- Heilt avhengige av andre

Med over 800 arbeidarar er verftet tilbake på dei heilt store høgder, slik dei ikkje har vore sidan 90-talet. Men noko er likevel annleis. Den gongen var to tredelar av arbeidarane fast tilsette, i dag tilsvarar det talet på innleigde. Dessutan baserer verftet seg no i mykje høgare grad på utanlandsk arbeidskraft, og i følgje Firdaposten er desse snart i fleirtal. Jan Tore Bøe stadfestar denne utviklinga.

- Skal vi kunne ta på oss dei oppdraga som vi har gjort no, så er vi heilt avhengige av innleigd arbeidskraft, seier han.

- Bør tenkje norsk

Organisasjonsarbeidar i Fellesforbundet, Jan Olav Gjerde, seier at dei forstår at bedrifta er skeptisk til å auke med eigne tilsette når dei ser kva som har skjedd i denne bransjen dei siste åra. Han meiner likevel at verfta bør satse meir på å rekruttere nordmenn.

- Vi har sagt at det å handle rimeleg, utanlandsk arbeidskraft når ein treng det, for så å kvitte seg med dei når behovet ikkje er der lenger, ikkje er rette måten å møte framtida på, seier han.