Vil ha ubåtvrak fjerna

Tysdag bestemte Fiskeri- og kystdepartementet at ubåtvraket utanfor Fedje i Hordaland ikkje skal hevast, men dekkast til.

- 65 tonn kvikksølv skaper uro

Departementet har kome fram til at det er mindre miljøfarleg å late vraket frå andre verdskrigen bli liggende, samanlikna med å heve det. I nabokommunen Gulen er dei uroa over at det kvikksølvfylte vraket no blir liggjende på havbotnen.

Magne Mjånes, leiar i Byrknes og øyane fiskarlag, seier departementet si avgjerd skapar uro i Gulen. 

- 65 tonn kvikksølv skapar uvisse. Dette er ei miljøgift som ikkje forsvinn, så for komande generasjonar er dette eit alvorleg trugsmål.

- For dårlege undersøkingar

Ordfører i Gulen, Trude Brosvik, meiner departementet burde ha undersøkt andre alternativ betre. Ho er ikkje nøgd med løysinga som vart lagt fram i går.

- Her burde det reise seg eit folkekrav om at fleire kunnskapsmiljø hadde vorte høyrde før dei bestemte seg for å late vraket liggje.

Aviser kritikken

Statssekretær Vidar Ulriksen avviser kritikken. Han viser til at både Norske Veritas, Norges geologiske institutt og Niva - i tillegg til eit kjent nederlandsk firma, har vore med på undersøkingane.

- Det er mange som har gjeve råd i saka. Vi har brukt den fremste ekspertisen både i Norge og internasjonalt, seier han.