Då 60 år gamle Gunstein Førde frå Høyanger måtte bytte ut ei bru han hadde knekt, skulle norske tannlegar ha 35.000 kroner for å behandlinga.
Dermed vart sogningen ein av stadig fleire nordmenn som reiser over landegrensene for å få rimelegare tannlegehjelp.
– Eg tykte det var ein stiv pris, så eg byrja å sjekke litt. Mellom anna i Polen der eg er litt kjend, fortel Førde.
– Ingen problem
Og det er til land som Polen, Ukraina og Russland mange nordmenn reiser for å gjere tannlegerekninga tusenvis av kroner mindre.
Ifølgje Ragnar Vik i ForbrukerEuropa er nordmenn på jakt etter tannlege i utlandet ein aukande trend.
For Førde kom prislappen for arbeidet på 5.500 kroner.
– Eg var jo stornøgd. Eg var spent på resultatet og eg venta eit godt døgn der nede, men arbeidet var det ingenting å seie på. Eg har heller ikkje hatt problem i ettertid, seier 60-åringen om behandlinga han fekk i Polen.
Dårlegare tilbod i Norge
I Førde meiner tannlege Anders Henning Sægrov at den aukande trenden av nordmenn som reiser utanlands for behandling av tennene, kan ha negative følgjer for den norske tannpleia.
– Då vil det sjølvsagt bli mindre å gjere for tannlegar i Norge. Og då kan tilbodet bli mindre også, seier han og legg til at behandling i utlandet ikkje alltid er til å stole på.
Få klagar
– Ein kan jo fort ende opp med at du får tilbod om behandling i utlandet, der ein kan stille spørsmål ved om behandlinga eigentleg er naudsynt. Då hjelp det ikkje kor billig det er, seier Sægrov.
Ragnar Vik, direktør i Forbruker Europa, trur ikkje det er mange som har dårlege erfaringar med tannklinikkar i utlandet.
– Reiser tilbake
– Vi har ikkje motteke mange klager, og det er relativt få spørsmål vi har fått på dette. Så det er jo grunn til å tru på at dette stort sett går bra, seier Vik.
Gunnstein Førde er ikkje i tvil om kvar han kjem til å gå til tannlege framover.
– Eg kjem til å reise tilbake om det ikkje er direkte akutt. Er det ei litt større oppgåve, så kjem eg til å ta det i Polen, avsluttar han skråsikkert.