Fire av vegane er framleis stengde på grunn av ras eller skred. Dette gjeld fylkesveg 337 mellom Hafslo og Veitastrond. Her skal det ha gått eit snøskred i Bjørnabakkane.
Fylkesveg 53 mellom Øvre Årdal og Holsbru er no opna for trafikk, etter at ein først måtte stengje vegen etter eit snøskred ved Jåteli.
Ved ni-tida måndag morgon vart fylkesveg 50 Hol - Aurland stengd. Stengd er også fylkesveg 451 mellom Vassenden og Kjøsnes i Jølster. Her har det gått steinras.
Vart opna
I Bremanger var fylkesveg 616 mellom Davik og Dombestein stengd på stengd på grunn av fare for ras.
Fylkesveg 694 er opna mellom Reed og Årdal i Gloppen, medan riksveg 13 over Vikafjellet igjen er stengt etter eit snøskred.
– Eg reknar med at vi har folk på plass når det blir lyst for å sjå om vegane er tilrådelege å opne eller ikkje, sa vaktoperatør Arne Stadheim hos Vegtrafikksentralen i Lærdal måndag morgon.
Stengt i Fjaler
Søndag kveld vart den kommunale vegen mellom Stav og Myklebust i Fjaler stengd. Måndag morgon er vasskadane så store at mindre bilar ikkje kan køyre.
Her håpar dei å kunne opne vegen i løpet av dagen.
– Bør vere obs!
Telen i jorda og dei høvesvis store nedbørsmengdene gjer at rasfaren for tida er stor i fylket. Det er venta regn opp i 2.000 meters høgde.
Når vatnet ikkje får trekkje ned i jorda, kan det også føre store mengder vatn inn i vegen.
– Bilistane bør vere merksame på dette med vassplaning. Det kan vere ein del overflatevatn kring om. I tillegg kan isnedfall vere skummelt, seier Stadheim.