I Høyanger gjekk dei 47 millionar i overskot før skatt, mot 136 millionar i 2011. Men trass i eit mindre overskot enn året før, fabrikksjef Wenche Eldegard er nøgd i eit år med låge aluminiumsprisar.
– Eg er godt nøgd med resultatet, for det har vore eit krevjande år for aluminiumsindustrien. Prisane har vore låge, men i Høyanger har vi hatt det veldig bra driftsmessig. Vi har klart å halde kostnadene på eit brukbart nivå. Det har kompensert noko for dei låge prisane, seier Eldegard.
– Det at de gjer det så bra i dårlege tider, er vel eit godt signal for vidare eksistens for metallverket i Høyanger?
– Ja, det er det vi håper og trur. Vi gjer det vi kan for å ruste metallverket til å tåle desse svingingane i marknaden. Vi er eit lite verk, og er sårbare for svingingar i prisane.
Verket i Årdal produserer 279 124 tonn ferdig produktet i form av valseblokker og støypelegeringar, medan Høyanger produserte 116 891 tonn valseblokker.
- LES OGSÅ:
- LES OGSÅ:
Frykta det kunne gått verre
Verket i Årdal gjekk med ni millionar i underskot, men også det var betre enn dei venta. Resultatet er 393 millionar kroner dårlegare enn i 2011.
Fabrikksjef Arne Werge-Olsen frykta det kunne ha gått mykje verre.
– Det var ein betydeleg nedgang i metallprisen, vi snakkar om 400 dollar per tonn. I tillegg har vi hatt utfordringar på elektrolyse, noko som har gitt seg utslag i lågare produksjon i fjor. Men samstundes har vi hatt eit fantastisk godt arbeid med forbetringar på kostnader.
– Hadde de frykta større underskot?
– Ja, det gjorde vi. Men tiltak blei gjort heile tida for å kompensere for den låge metallprisen, seier han.
Positiv – men trur på vanskeleg år
Werge-Olsen seier det er vanskeleg å spå korleis det utviklar seg dei neste månadene, men at prisane ser betre ut.
– Vi gjer også eit godt arbeid når det gjeld forbetringar og elektrolyseproduksjonen ser betre ut framover.
Han seier at begge metallverka sel valseblokker på lengre kontraktar.
– For 2013 har vi i Årdal ikkje fylt heile volumet, men det ser ikkje så gale ut. Samstundes er vi ein liten aktør og har også moglegheit til å gå inn på nisjeprodukt. Eg ser positivt på tida framover, men trur framleis at 2013 blir eit vanskeleg år.
- LES OGSÅ: