– Det burde vore likt over heile fjøla, er kravet frå transportleiaren.
Men slik er det altså ikkje. Statens vegvesen deler nemleg inn vegane i Vinter-Norge i tre forskjellige kategoriar. Dei som skal vere is- og snøfrie, dei som skal saltast ved rim og berrfrost og dei som enkelt og greitt er vintervegar.
- LES OGSÅ:
Vanskeleg med skiftande føre
Men denne inndelinga er ikkje like enkelt å forstå seg på for alle. NRK fortalde tidlegare denne veka om dagpendlar Arne Rørvik som undrar seg over at han møter på svært så forskjellig føre på E39 frå Vadheim til Førde.
Også fylkesleiaren i Lastebileigarforbundet etterlyser same standard på E39 gjennom fylket vinterstid.
– Entreprenørane som jobbar her gjer heilt sikkert så godt som dei kan, og det er sikkert ikkje så enkelt. Men det burde vore lik standard, seier Øren til NRK.no.
På E39 er det mellom anna krav om at vegen mellom Bergen og Vadheim skal vere snø- og isfri. Litt lenger nord i fylket, mellom Vassenden og Sandane til dømes, kan det derimot vere både snø og is i vegen.
Øren seier det er store utfordringar knytt til å køyre store bilar på slikt føre.
– Vegane her er ofte smale nok frå før av, og når ein slit med å sjå kantane når det er dårleg brøytt, så blir det store utfordringar med store bilar, seier Øren.
- LES OGSÅ:
- LES OGSÅ:
(Artikkelen held fram under TV-saka)
Får stadig tilbakemeldingar
Han får stadig telefonar frå medlemmer som opplever at det er vanskeleg å ta seg fram på vintervegane.
– Eg fekk nyleg ein telefon frå ein sjåfør som bad oss kontakte Vegvesenet. Han var misnøgd med vegane i Nordfjord og oppover E39 Stigedalen og vidare nordover, seier Øren.
– Sjåføren følte at det var risikabelt og frykta det kunne skje ulukker, legg han til og seier at berre nokre timar seinare hadde forholda betre seg.
- LES OGSÅ:
- LES OGSÅ:
Trafikk og klima bestemmer
Prosjektleiar i Statens vegvesen, Lars Erik Karlsen, seier det er mange faktorar som avgjer kva deler av vegen som skal vere snø- og isfrie. I hovudsak er dette kor mykje trafikk det er på vegen og dei klimatiske forholda i området der vegen går.
Han seier det ikkje er noko alternativ å salte alle vegar, og ber bilistane tilpasse seg forholda.
Det blir no sett på om det kan late seg gjere å salte endå meir av E39 i Sunnfjord.
– I første omgang vurderer vi Førde-Skei, seier Karlsen.