– Eg fant ut at dikta mine vart betre dess meir tekst eg fjerna. Til slutt var dei veldig korte, seier bokdebutanten.
Håland kjem frå Høyanger, men bur i Oslo. Ho har studert på Westerdals i Oslo og no jobbar ho i ein kaffebutikk. Boka «Kjersti er ein fiktiv person, helsing Kjersti» består av om lag 100 dikt.
Stiller spørsmål ved kva som er ekte
Dikta er inspirert av Haiku-dikt, ei tradisjonell japansk diktform. Formatet derimot minner om dei korte, presise meldingane ein skriv på nettsamfunnet Twitter. No blir dikta bok.
– Dikta handlar om at ein blir sett på ein særskild måte – men korleis klarer ein å sjå seg sjølv slik andre ser? Ein slags paranoia skin gjennom i tekstane, fortel Håland.
Dei kortfatta dikta stiller spørsmål ved kva som er ekte når alt i verda kan kjennast fiktivt. Diktsamlinga handlar om at ho som menneske kjenner seg framandgjort for verda og ynskje om å bli lagt merke til vert stadig større.
GLER SEG TIL BOKA KJEM: Om ikkje lenge er dikta i bokform
Foto: PrivatHØYR KJERSTI LESE EIGNE DIKT I LYDKLIPPET UNDER
God respons frå forlaget
Boka kjem ut i vår og vert publisert av Flamme Forlag. Håland fekk napp på fyrste forsøk når ho sendte inn eit utkast. Forlagssjef, Nils-Øivind Haagensen, likte umiddelbart det han las.
– Det er veldig høgt nivå på dikta hennar. Dei er morosame og leikne, vi ønskte å ha ho i forlaget vårt med ein gong vi las utdrag frå boka, seier Haagensen.
Bokdebutanten har alltid likt å skrive dikt, men i tenåra la ho diktskriving på hylla. Dei siste åra har ho studert på den kreative fagskulen Westerdals i Oslo, og der har ho mellom anna arbeidd med å skrive manus. Etter tre år med studiar på tekstforfattarlinja gjekk ho tilbake til diktskriving.
– Det var jo dikt eg starta å skrive, det var godt å finne tilbake til diktformen att. Det er inga konkluderande form i dikt. Det kjennast heller som spørsmål eg stiller til dei som les dikta, seier ho
GLER SEG TIL BOKA KJEM: Om ikkje lenge har ho den fysiske utgåva i handa
Foto: PrivatSpent debutant
Bokdebuten vart skriven i løpet av hausten 2012, og no er Håland spent på debuten i vår. Det er ikkje enkelt å seie korleis den litt uvanlege diktsamlinga vert motteken, men ho gler seg til responsen.
– Det er herleg å endeleg ha objektive menneske som skal høyre dikta mine. Eg gler meg til å halde boka i henda og at det ikkje berre er eit dokument på macen, fortel ho nøgd.