Fann dumparen på 230 meters djupne - ingen teikn til sjåføren

Ved 14.15-tida tysdag ettermiddag vart dumparen lokalisert. Operasjonsleiar Inge Værøy ved Sogn og Fjordane politidistrikt fortalde at miniubåten måtte langt ned for å finne køyretyet.

– Det er gjort funn av dumparen på cirka 230 meters djupne, sa Værøy til NRK.no like før klokka 15.

– Dumparen er tom. Det er ikkje teikn til den sakna inne i køyretøyet, opplyser han.

– Veit de kva som kan ha skjedd med føraren?

– Nei. No vil det bli gjort meir søk rundt området der dumparen ligg, og oppover langs skråninga.

– Har de håp om å finne personen?

– Ja, vi jobbar med det som utgangspunkt, seier Værøy.

(Artikkelen held fram under biletet)

Leitar vidare etter sjåføren

Meldinga om at dumparen hadde gått på fjorden kom til politiet ved 18.40-tida måndag kveld. Det var kollegaer av mannen som meldte frå, men ingen av dei skal ha sett kva som skjedde.

Det vart raskt sett i gang søk i fjorden, og både dykkarar og ein miniubåt søkte i heile går kveld etter køyretyet og sjåføren. Ved 01-tida natt til tysdag var søket avslutta, utan resultat. Ein hadde då gjort søk heilt ned til 120 meter.

• LES OGSÅ: Leitar i fjorden etter sakna mann
• LES OGSÅ: Miniubåt kjem til Dalsfjorden i 11-tida

I dag har det blitt henta inn ein miniubåt som kunne gå djupare, og denne har sidan 11-tida i føremiddag gjort søk i området der dumparen har gått i fjorden.

Etter funnet av dumparen vil ein no halde fram søket utover ettermiddagen for å prøve å finne den sakna 25-åringen som køyrde.

– Søket vil halde fram med bruk av miniubåten, seier Værøy til NRK.no ved 15-tida.

Det er førebels ikkje teke stilling til kva som vil skje med dumparen. Værøy seier til NRK.no at eigaren av køyretyet også vil vere med å bestemme om dumparen skal hevast.

Flyttar seg vestover

Ved 18-tida er det framleis ikkje gjort funn av dumparføraren i fjorden. NRK får opplyst ved politiet sin operasjonssentral at søket vil halde fram utover kvelden.

Nede i fjorden er det like stummande mørkt både natt og dag.

– No er dei ferdige med søk i området der dumparen vart funnen. Det blir no søkt vestover, systematisk utover og nedover, opplyser politiet til NRK.no ved 18-tida.

Prosjektleiar Einar Hovland i Statens vegvesen seier spesialfartyet KNM "Tyr" vil kome til området ved midnatt for å hjelpe til i søket. Skipet er utrusta med ein sonar, som vil gi større søkemoglegheiter.

Startar opp att søket i morgon

Politiet opplyser ved 20.30-tida at søket med miniubåten, den såkalla ROV'en, vil bli avslutta ein gong før midnatt. Miniubåten vil bli sett inn att i søket frå onsdag morgon.

Det er enno ikkje gjort funn av føraren får NRK opplyst ved 22.30-tida. Søket med miniubåten er no avslutta for kvelden.

Ifølgje politiet vil KNM "Tyr" ta del i søket når det kjem fram til området ved Eikenes rundt midnatt. KNM "Tyr" er eit spesialfarty for djupe undervassoperasjonar.

• LES OGSÅ: Får hjelp av forsvaret i søket
• LES OGSÅ: Har starta søk med miniubåt etter sakna dumperførar (25)