Har starta søk med miniubåt etter sakna dumperførar (25)

Ubåten kom til Eikenes like over klokka 11 tysdag føremiddag. I tillegg søkjer ein ambulansebåt langs land .

25-åringen frå Ørsta har vore sakna etter at dumparen han førte køyrde i Dalsfjorden måndag kveld. Ulukka vart meld klokka 1840.

Kast i kast

Den sakna var tilsett i entreprenørfirmaet K.A. Aurstad og køyrde pukk frå Eikenestunnelen då ulukka skjedde ved ein snuplass.

Politiet opplyser at fjorden er opp mot 300 meter djup på staden.

– Køyretyet har gått kast i kast ned i fjorden, så det er vanskeleg å seie om ein finn førar og køyrety på same stad, opplyste operasjonsleiar Wenke Hope ved Sogn og Fjordane politidistrikt.

(Artikkelen held fram under biletet)

Stoggar anleggsarbeid

Kollegaer av 25-åringen var tysdag føremiddag samla på Askvoll hotell og reiste like etter til ulukkesstaden for debrifing. Arbeidet i det aktuelle området er stogga medan politiet gjer sine undersøkingar på ulukkesstaden.

(Artikkelen held fram under videoen)

Arbeidet på Eikenestunnelen og ei veglinje i dagen blir stogga. Entreprenør NCC får halde fram arbeidet i Ottersteintunnelen, kring tre kilometer frå ulukkesstaden.

– Før politiet har gjort sine undersøkingar, så kan ikkje vi utføre arbeid der. Det er vanleg prosedyre, seier prosjektleiar Einar Kåre Hovland i Statens vegvesen.