Soknerådet samla seg i bøn - kriseteamet er klart til å rykkje inn

Då soknerådet i Gulen hadde møte i går, nytta dei høvet til å be for dei involverte i Algerie-situasjonen.

Soknerådet hadde i går møte, og slik situasjonen var, fann dei det naturleg å be. Framleis er situasjonen uavklart for mannen frå Gulen som var på jobb på gassanlegget i In Amenas i Algerie då militante islamistar gjekk til angrep.

– Det er naturleg at når folk som trur på Gud kjem saman, at dei nyttar bøn, så det skjer nok. Også soknerådet vårt har vore saman på den måten, stadfestar Brosvik, utan at ho ønskjer å utdjupe soknerådsmøtet noko ytterlegare.

• LES OGSÅ: Gulenordførar: Uvissa er verst
• LES OGSÅ: Framleis uavklara om Gulen-mann

Kommunen er utan prest

Gulen er for tida utan fast prest, då soknepresten deira er sjukmeld. No vert det teke grep for å få på plass ein prest i kriseteamet til kommunen.

– Prosten i ytre Sogn har sagt at han i løpet av dagen skal ha klar den presten som skal stå til rådvelde for kriseteamet, og vere med der når og viss det trår i kraft, seier Brosvik.

Det er førebels ikkje organisert nokon møteplass eller samlingsstader for folk som ønskjer ei stille stund i samband med situasjonen som går føre seg.

– Nei, det er ikkje noko opa kyrkje her, seier Brosvik.

Ho legg til at det heller ikkje er konkrete tankar om noko slikt, men avviser ikkje at det kan verte aktuelt på eit seinare tidspunkt.

(Artikkelen held fram under biletet)

• LES OGSÅ: Klare til å hjelpe om det trengst
• LES OGSÅ: Atle Bjarne skulle reist ned att på jobb i Algerie om to veker

Informasjon er førsteprioritet

– Men det er ikkje sett i verk nokre tiltak. I første omgang no trur eg det viktigaste for folk er å få vite kva som skjer. Så vil det kanskje på sikt, kanskje uavhengig av korleis utfallet blir, vere behov for støtte og hjelp seinare, seier Brosvik.

Ho peikar også på at det er opp til alle å vere eit medmenneske for folk rundt seg i den situasjonen som er.

– Eg trur kanskje at her kjem det positive med å bu i eit lite og oversiktleg samfunn til sin rett. Ein er van til å stille opp for kvarandre og ta ansvar, seier Brosvik.

• LES OGSÅ: Norsk evakueringsfly har landet i Alger
• LES OGSÅ: Statoil: – Norsk gissel i sikkerhet

Ta kontakt viss du treng det

Kriseteamet i Gulen kommune står klart dersom det skulle vere behov for det.

– Det er ikkje iverksett nokon synlege tiltak her i Gulen, men kriseteamet er varsla og rådmann og ordførar er varsla. Vi sit i grunn og ventar på utspel, seier kommunelege i Gulen kommune, Tommy Normann.

– Kva skal folk i Gulen gjere dersom dei treng nokon å snakke med?

– Dei kan ta kontakt med kriseleiar, og så kan ein få etablert kontakt med nokon av oss slik, seier Normann, og syner til heimesida til Gulen kommune for ytterlegare informasjon.

• LES OGSÅ: - Stabil situasjon for nordmann som kom i sikkerhet i natt

Politiet står til dispensasjon

Politiet stadfestar at dei også er klare til å hjelpe dersom situasjonen skulle krevje det.

– Så langt har ikkje det lokale politiet fått noko førespurnad frå Gulen kommune i denne saka, seier Ivar Holmaas, lensmann i Masfjorden, Gulen og Solund lensmannsdistrikt.

Men han presiserer at politiet følgjer situasjonen nøye.

– Vi er orienterte om at det er ein uavklart situasjon for ein innbyggjar i Gulen, og vi er tilgjengelege i den grad det er behov for vår hjelp, seier Holmaas.

Han legg til at det er Gulen kommune som handterer situasjonen slik den står no.

– Deira fokus, og i den grad vi skal gjere noko, så vil vårt fokus vere å hjelpe dei som er oppe i denne forferdelege situasjonen, seier Holmaas.