Navarsete får fornya tillit som Senterpartileiar

Partiet har vore igjennom ein turbulent periode og har slite med fallande oppslutnad.

• LES OGSÅ: Full støtte til Navarsete som leiar
• LES OGSÅ: Lite populær blant Sp-veljarane

Valkomiteen meiner likevel at Liv Signe Navarsete er den rette leiaren. I same innstillinga går komiteen for Ola Borten Moe og Trygve Slagsvold Vedum som høvesvis 1. og 2. nestleiar.

– Vi meiner at dei tre er dei rette til å leie Senterpartiet vidare, seier leiar Magnar Lussand i valkomiteen i ei pressemelding.

– Vi ser at Senterpartiet leverer svært godt på det politiske området. Og det er det som tel. Fylkeslaga har gjeve sine innspel til valkomiteen, og vi konstaterer at Senterpartiets leiartrio har brei oppslutnad i partiet, heiter det vidare.

Lussand seier vidare at komiteen har gjennomført grundige intervju med kandidatane.

– Vår konklusjon er klinkande klar. Valkomiteen har tillit til leiinga i partiet. No er det opp til landsmøtet om dei vil setje sitt stempel på valkomiteens konklusjon, seier Lussand.

Komiteen held fram arbeidet med å setje saman framlegg på resten av sentralstyret. Valkomiteen vil leggje fram den samla innstillinga si til nytt sentralstyre i god tid før Senterpartiets landsmøte på hotell Alexandra i Loen 5. – 7. april.