VIL HA NORDFJORDINGAR: Ordførar Arild Iversen meiner nordfjordingar bør få nytte tingretten i Volda.
Foto: Ivar Lid Riise / NRKDet blir vist til at Kvivsvegen gjer reisetida for nordfjordingane langt kortare til Volda enn til Førde, der Fjordane tingrett ligg.
Volda-ordførar Arild Iversen meiner det er logisk at tingrettsgrensene blir endra for innbyggjarane i Hornindal, Stryn, Selje, Vågsøy og Eid.
– Det er viktig med kort veg for nordfjordingane også når det gjeld tingretten, seier han, seier han.
Viser til kortare reisetid
Det var like før jul i fjor at Volda kommunestyre vedtok ein samrøystes uttale der det blir bede om at domstolsadministrasjonen endrar tingrettsgrensene. Søre Sunnmøre tingrett er nedleggingstruga og ønskjer å styrkje posisjonen sin.
Der blir mellom anna vist til at det no tek 25 minutt mellom Hornindal og Volda og 45 minutt mellom Stryn og Volda, medan det tek to og ein halv time frå indre Nordfjord til Førde.
– Dette er ein dårleg ide
IKKJE EINIG: Førde-ordførar Olve Grotle tykkjer ikkje forslaget er ein god ide.
Foto: Kjell Arvid Stølen / NRKOrdførar i Førde Olve Grotle har på si side ingen sans for utspelet.
– Eg er oppteken av at Fjordane tingrett ikkje skal bli svekka. Difor tykkjer eg forslaget er ein dårleg ide.
Volda-ordførar Arild Iversen meiner mange vil dra nytte av at tingrettsgrensene blir flytta.
– Vi ser også at kort reiseveg er viktig for andre aktørar i tingretten. Det kan vere advokatar, vitne og politi, seier han.
Brukar rettssalen i Eid
Grotle viser til at nye vegløysingar vil gjere reisetida mellom Nordfjord og Førde kortare. Vidare påpeikar han Fjordane tingrett har ein eigen rettssal på Nordfjordeid som dei ofte brukar. Dermed fell poenget om kortare reisetid til Volda i stor grad bort, seier Grotle.
– Vi har fast rettssal og har eit samarbeid med jordskifteretten. I dag har vi eit tilbod lokalisert i Nordfjord. Kanskje vil det bli eit dårlegare tilbod for mange i Nordfjord dersom rettsgrensene blir flytta og folk må reise til Volda.