I ei fråsegn som er referert i Bergens Tidende i dag skriv elveeigarlaga i Flåm, Nærøydalen og Aurland at det er ei opplagt sak at cruiseskip i elveosane vil ha uheldige fylgjer for laks og sjøaure.
Både Flåmselvi og Nærøydalselvi er nasjonale laksevassdrag. Leiar Bjørn Vike i Aurland elveeigarlag og Sogn Villaksråd seier til NRK at dette har blitt ei svært betent sak.
– Når dei no planlegg å legge kaia i elveosen i Flåm, då er grensa nådd. Det er opplagt at det har konsekvensar å legge ei cruisekai på tvers av osen på eit nasjonalt laksevassdrag.
– Inga skam å snu
Vike meiner reiselivsnæringa og kommunen lagar ris til eigen bak dersom dei gjennomfører planane om ny cruisekai i Flåm.
– Dei vestnorske fjordane er kåra til det fremste reisemåla i verda. Her kan vi ryke utatt, for med desse planane er vi ikkje lenger berekraftige. Vi ber innstendig politikarane i Aurland om å tenkje seg om. Det er inga skam å snu.
Vike strekar under at elveeigarane ikkje er imot utvikling i lokalsamfunnet.
– Men vi må sjå på andre måtar å skaffe arbeidsplassar på. Det er ikkje med cruise vi skal redde bygdene våre.
Mot ny rekord
Det går mot ny rekord for talet på cruiseanløp i Flåm komande sesong, for første gong kan det kome over 200 cruiseskip.
Aurland kommunestyre har vedteke å greie ut bygging av ei fleire hundre meter lang faldebru - ein seawalk. Denne skal forankrast ved osen til Flåmselvi, skriv Bergens Tidende.
Ei tilsvarande faldebru vart teken i bruk i Skjolden i Luster kommune i 2012.
- LES OGSÅ:
- LES OGSÅ: