Vitusapoteket i Førde held stengt i romjula, kunne NRK fortelje fredag. Årsaken er at dei ikkje greier å skaffe vikar til sin farmasøyt.
No varslar fagforeininga Farmaceutene at behovet for denne arbeidskrafta vil auke.
Større behov
– Med samhandlingsreforma vil fleire kommunar også tilsette farmasøytar, og mangelen vil auke, seier leiar Tove Ytterbø i fagforeininga Farmaceutene.
– Behovet vil berre bli større.
Ytterbø peikar i tillegg på kampanjar om pasienttryggleik gjer at etterspurnaden etter farmasøytisk arbeidskraft aukar.
– Stavanger kommune er no i ferd med å tilsette sin første kommunefarmasøyt, seier ho.
Tidlegare har Trondheim kommune gjort det same. Ytterbø trur dette er noko fleire kommunar vil gjere i tida framover.
Nye arbeidsområder
Til dømes ved at farmasøyten går inn i tverrfaglege team saman med legar og sjukepleiarar, på sjukeheimar og i heimesjukepleien.
– Om ikkje alle kommunar tilset eigne farmasøytar, så ser vi heilt klart at samhandlingsreforma ønskjer å utnytte den kompetansen som farmasøytar har, på ein betre måte, seier Ytterbø.