Brasa utfor vegen og landa i fjæra

Politiet fekk melding om ulukka klokka 16.08, og alle naudetatane rykte ut til staden.

Ein bil skal ha køyrt av vegen, og vart liggande i sjøkanten vel 30 meter lenger nede. Politiet opplyste klokka 16.35 at ein person hadde kome seg ut av bilen, og at det ikkje var grunn til å tru at det hadde vore fleire i bilen.

Oppdaga hjul i vegbana

Etter det NRK kjenner til skal det ha vore forbipasserande som vart merksame på eit hjul som låg i vegbana, og oppdaga at det låg ein person i fjæresteinane. Politiet seier forbipasserande tok seg ned til mannen og fekk sett til han.

Redningsarbeidet var krevjande, og føraren vart til slutt flytta over på ei båre som vart dratt opp til vegen.

(Artikkelen held fram under biletet)

Frakta til sjukehus

Bilføraren, som er ein mann i slutten av 60-åra, er frakta til sjukehuset i Førde med luftambulanse. Ifølgje politiet skal han ha vore bevisst då han vart funnen av vitne, men dei kunne utover det ikkje seie noko om skadeomfanget ved 18-tida.

AMK ved Førde sentralsjukehus opplyser ved 21.30-tida fredag kveld at mannen er alvorleg skadd og får behandling ved intensivavdelinga.

– Bilen har køyrt over ein betongmur og hamna i sjøen. Den vart liggande mellom fem og ti meter frå strandlinja, opplyser operasjonsleiar Kjetil Avsnes ved Sogn og Fjordane politidistrikt til NRK.no ved 18-tida.

Kva som er årsaka til ulukka kan politiet ikkje seie noko om enno. Det har vore glatt på fleire vegar i Sogn og Fjordane fredag, og Avsnes seier det truleg også har vore det ved ulukkesstaden.