Fødeavdelinga julestengd

Helse Førde har vedteke å julestenge fødeavdelinga på Nordfjord sjukehus frå 22. desember til 2. januar. Fødestova i Lærdal vil òg vere stengt.

Sidan Nordfjord-kommunane sine jordmødre ikkje er på vakt i juleferien, må fødande kvinner reise heilt til Førde for å finne nokon som kan hjelpe dei.

-Skremmande

Marita Hovden er førstegongsfødande og har termin 18. desember. Då må ho reise frå Vågsøy til Førde for å føde.

- Det er litt skremmande, med vinter og dårleg føre.

Fryktar konsekvensane

Kommunejordmor i Selje, Aud Jekteberg Nordpoll, fryktar for dei fødande som må køyre heilt til Førde.

-Det er langt frå Eid til Førde. Vi veit at faren for at fødselen skjer undervegs eller at det oppstår komplikasjonar vert større når det er langt å køyre.

-Økonomien avgjer

Avdelingssjef ved Kvinneklinikken i Helse Førde, Agnete Dissing Settem, forsvarar vedtaket.

-Dei økonomisk rammene er årsaka til avgjerda. Vi har teke ei fagleg vurdering, og meiner dette er ei forsvarleg løysing.