Bellona skyt langt over mål når dei no prøver å få stoppa seismikkskytinga utanfor Lofoten og Vesterålen. Det meiner LO-sekretær i Nordland, Øivind Silåmo.
- Dei er ikkje interesserte i at vi skal få ei avgjersle i 2010 om kor vidt ein skal opne Nordland VI eller VII for oljeboring, seier Silåmo.
- Eitt av mange påfunn
Å skyte med seismikk vil seie å sende kraftige lydbølgjer ned mot havbotnen, for å leite etter olje eller gass. Det er usemje om kor skadeleg dette kan vere for naturen og livet i havet. Bellona har no meldt oljedirektoratet til politiet for støyforureining.
Dette er berre eitt av fleire påfunn frå Bellona for å få stoppa leiting etter olje, meiner Silåmo.
- Desse seismiske undersøkjingane er jo ein del av det som låg i den heilhetlege forvaltningsplanen, som styresmaktene har vedteke skal gjennomførast, seier distriktssekretær Øivind Silåmo i LO Nordland.
