– Det er fantastisk. Både for han Henning og for norsk fotball generelt.
Det var Kjetil Rekdal sine umiddelbare tankar, etter at det blei klart at Henning Berg er tilbudt jobben som trenar for Blackburn.
- LES OGSÅ:
Trur erfaring frå Blackburn kjem godt med
Medan Kjetil Rekdal har trenarperiodar i Vålerenga, Tyskland og no AaFK, har Henning Berg éi lang periode i Lyn og éi i Lillestrøm.
No kan han altså ta steget til England, der Morten Gamst Pedersen sitt Blackburn ventar.
– Henning har lang fartstid som spelar, og har spelt for Blackburn i to periodar. Han har store fotballkunnskapar og mykje erfaring, kommenterer Rekdal på spørsmål om kvifor Berg eignar seg for Blackburn-jobben.
Berg var først i Blackburn frå 1992-97, før han var tilbake i 2000 etter ein fireårsperiode i Manchester United. Der spelte han saman med mellom andre Ole Gunnar Solskjær og Ronny Johnsen.
I Blackburn har Berg vore lagkamerat med mellom andre Stig Inge Bjørnebye, Lars Bohinen og Egil Østenstad.
– Han har vore der, noko som nok er ein fordel. Han veit litt om miljøet og om kva som krevst. Så han kjem til å gjere det bra, trur Rekdal.
– Det er ein tøff jobb
Blackburn rykka ned frå Premier League i vår, etter å ha blitt nest sist. No forventar folk i Blackburn at laget tek steget tilbake igjen på første forsøk.
I augneblinken ligg laget på 5. plass i Championship, på éin av dei fire kvalifiseringsplassane, like bak dei to plassane som gjev direkte opprykk.
– Det er ein tøff jobb å få Blackburn opp igjen. Det er 46 kampar, og det er knalltøft å bli nummer éin eller to, for der er mange jamgode lag.
– Men det er langt frå umogleg, meiner AaFK-trenaren.
«Drillos» har blitt trenarar
Frå før er Ståle Solbakken trenar i Championship. Han leiar Wolverhampton, som i augneblinken er nummer åtte, to poeng bak Blackburn.
- LES OGSÅ:
Både Solbakken, Berg og Rekdal har lang fartstid som spelarar i utlandet, og alle tre var ein del av «Drillos» på 90-talet.
I tillegg til dei tre har mellom andre Ole Gunnar Solskjær, Frode Grodås og Stig Inge Bjørnebye gjort trenarkarrierar etter spelarkarrieren.
– Kva er grunnen til at så mange under Drillo har blitt trenarar?
– Vi var kloke fotballspelarar som var vant til å ta ansvar. Vi hadde god speleforståing, og mange av oss var leiartypar. Det er det beste svaret eg kan gi, seier Rekdal til NRK.no.
– Kva har dette å seie for norsk fotball?
– Veldig mykje. Vi får Noreg på kartet, med landslaget på veg oppover og eit U-landslaget som har gjort det bra i det siste. I tillegg har laga i Europacupen gjort det betre enn i fjor.
– Med norske trenarar i utlandet følgjer forhåpentlegvis spelarane òg, avsluttar Kjetil Rekdal – som sjølv har sagt han er lysten på jobben som landslagstrenar etter nettopp Egil «Drillo» Olsen.
Kva trur du er grunnen til at svært mange spelarar frå «Drillos» no er trenarar? Sei meininga di i kommentarfeltet under.