Redningsskøytene sin viktigaste jobb er å berge menneskeliv og verdiar når uhellet er ute. I dag fekk redningsskøyta, Emmy Dyvi, som er fast stasjonert i Ålesund og Fosnavåg, ei uromelding om ein kattunge som sat fast under ei kai.
– Vi var jo like i nærleiken og då var det jo klart at vi ville hjelpe til, seier styrmann Steinar Dimmen.
Dykkar
Matros og kokk ,Ole Johnny Hansen, tok på dykkardrakta og saman gjekk han og Dimmen ut med lettbåt for å redde den forskremde katten. Det var hotelltilsette like ved som melde frå om det hjelpelause dyret. Dei har observert at den vesle katten ikkje klarte å kome seg på land sjølv.
– Då vi nærma oss med båten vart katten endå reddare. Han gøymde seg så langt under kaia at vi ikkje nådde tak i han, fortel Dimmen.
Laga rømmingsveg
Det hjelpte heller ikkje å lokke pus med god mat. Dermed måtte redningsselskapet legge om taktikken.
– Vi sette like godt opp ein stige, så katten får berge seg sjølv. Vi veit jo at kattar ikkje er så flinke å klatre i stigar, så vi har lagt plankar på, seier Dimmen.
Dei har også lagt att leverpostei for å prøve han.
Dette er aller første oppdraget der Dimmen er med på å berge dyr. Han veit at firebeinte betyr mykje for folk og synest difor at det var kjekt å gjere ein innsats.
– Det kan jo hende at vi tar oss ein tur til for å sjå etter om pus har brukt rømmingsvegen litt seinare, seier Dimmen.