Stopp i utkøyring av mat til eldre

Heimetenesta i Sykkylven leverer middagsmat til 88 år gamle Gunvor Strømme. Gunvor har hatt glede av å få maten levert på døra, men i dag var siste dagen.

- Eg kan ikkje gå ut og handle sjølv lenger. Det vil seie, eg kan det dersom nokon er med meg, men eg vil ikkje laste nokon med det, for eg får hjelp til så mykje anna, seier 88-åringen.

- Trist at vi må skjere ned

På kjøkkenet i omsorgssenteret held dei fram med å lage mat, men heretter må dei som vil kjøpe, hente maten sjølve. Heimetenestene måtte kutte ein halv million kroner i budsjettet for 2012 og stansar utkøyringa.

- Det er trist at vi må skjere ned, seier Solfrid Hammernes Utgård, som er einingsleiar i Heimetenestene i Sykkylven.

- Det er ikkje store summar, men budsjetta vore har vorte så stramme at det fører til at det går ut over brukarane.

- Dette er det siste vi kuttar

I Giske kommune gjer dei det annleis. Der erfarer dei at middagstilbodet sparar sjukeheimsplassar.

- Dette tilbodet er svært viktig, seier kokk Anita Bjørke, som serverer karbonade med løk, poteter og grønsaker i dag.

Ho arbeider med å lage mat til alle institusjonene i Giske kommune. Men i tillegg får omkring 30 heimebuande eldre sikra godt kosthald med varm middag på døra opptil sju dagar i veka.

- Om dei eldre ikkje hadde hatt dette tilbodet, er det ikkje sikkert dei hadde ete middag, seier ho.

Dei som får maten heim betaler 79 kroner for dag, medan frivillegheitssentralen i Giske kommune gjer leveringa gratis.

Giske kommune betaler driftsutgiftene for utkøyringa, og satsar på at tilbodet er kome for å bli.

- Dette er så viktig for dei eldre at dette er noko av det siste vi vil kutte i dersom vi må kutte. Eg er sikker på vi sparer mange sjukeheimsplassar med denne tenesta, seier ordførar Knut Støbakk (KrF).