Til topps i Trondheim

- Det er ganske utruleg at vi gjekk heilt til topps, seier Vatle Wang Solheim til NRK etter å ha gått sigrande ut av konkurransen Gründercamp i Trondheim, saman med fire av sine medelevar frå Atlanten videregående skole i Kristiansund.

- Vi er innmari glade!

I Trondheim vart elevar frå vidaregåande skular frå heile landet presentert for eit oppdrag knytt til tema som fornybar energi, energieffektivisering, ny energiteknologi og klimautfordringar.

I år var oppgåva å finne framtidas energiløysingar for morgondagens bustadar.

Magnus Smith, Maria Skaret, Lisa Blakstad Dahl, Rune Nordmo og Vetle Wang Solheim gjekk fredag forbi 25 andre lag med si løysing for korleis ein kan nytte fornybar energi inne i bustadhus.

Torsdag føremiddag fekk dei utdelt oppgåva, og etter ei nærare sømnlaus natt, var dei klar til å levere klokka 07.00 fredag.

- Målet var å løyse oppgåvene på ein best mogleg måte. Tanken vår heile vegen var at ingen nyttar seg av fornybar energi utan at dei har kunnskap om det, og det var dette vi bygde vår oppgåve rundt, fortel Vetle Wang Solheim.

Og det skulle vise seg å vere smart. Vetle Wang Solheim og laget hans frå Atlanten vann juryen sitt hjarte, og dermed heile konkurransen.

- Juryen er streng, så det er hardt å kome til toppen. No er vi innmari glade!

- Ei spanande løysing

Gründercampen er eit samarbeidsprosjekt mellom Enova og Ungt Entreprenørskap, og laget frå Atlanten får mykje skryt for si løysing.

- Løysinga til vinnarlaget er kjemperelevant. Det er behov for tenesta, den forenklar kvardagen og ein kan tilpasse løysinga lokalt. Dette er ei spanande løysning som har stort potensial for å gjere ein skilnad, seier Anne M. Abelgaard, ansvarleg for Enova si barne og ungdomssatsing.

Og Kirsten Aure, dagleg leiar i Ungt Entreprenørskap Møre og Romsdal sparer heller ikkje på lovorda.

- Desse elevane har brukt sin teoretiske kunnskap til å kome fram til ein praktisk og framtidsretta teneste som kan kome både oss enkeltmenneske og samfunnet til gode. Når elevane får jobbe slik, ser dei nytten av teorien og det gir motivasjon for vidare læring.