88 fjell i Møre og Romsdal kan utvikle store fjellskred

Møre og Romsdal er det første fylket i landet som har utarbeidd ei detaljert risiko og sårbarheitsanalyse for store fjellskred. Heile Vestlandet, Nordland og Troms er dei områda i Noreg der faren for store fjellskred er aller størst.

– Arbeidet som er presentert no er svært viktig og nyttig for den framtidige overvakinga av dei rasfarlege fjella. Analysen som er laga no blir eit viktig instrument for korleis vi skal handtere risikoen for store fjellskred, seier fylkesgeolog Einar Anda til NRK.

• Les også: Dei overvakar Noregs farlegaste fjell
• Les også: 80 meter høy flodbølge kan komme

– Ein alvorleg risiko

I rapporten blir fjellskred karakterisert som ein alvorleg risiko i Møre og Romsdal. Kartlegginga som starta i 1996 har identifisert 88 fjellparti som kan føre til fjellskred med over 100 000 kubikkmeter masse.

• Les heile rapporten her.

Fire parti har høg risiko. Det er Mannen i Rauma, Åkneset i Stranda og øvre og nedre Hegguraksla i Norddal.

– Rapporten avdekkjer ikkje nye høgrisikoområde. Men no blir det auka fokus på område med middels risiko, seier fylkesgeolog Einar Anda. Nokre av desse skreda kan ha store følgjer om skredet skulle gå, seier han.

• Les også: Vil ha beredskaps-aksept
• Les også: - Borten Moe må besøke Storfjorden

Sjekk om fjell nær deg er på lista

Sjå dette kartet. Kartet er heilt nytt, og blei presentert i dag. Dei raude områda er er dei farlegaste områda. Dei gule områda har middels høg risiko. Dei grøne har potensiale til å utvikle skred, men risikoen er låg. Dei kvite er uavklart.

Sjå heile lista her

Lista over fjellområde med fare for store fjellskred er omfattande. Dei raude områda blir allereie overvaka. I rapporten blir det foreslått å setje i verk overvakingstiltak på fleire av dei gule områda.

– Vi foreslår periodisk overvaking på fleire av områda som er markerte med gult. Vi trur dette er nok til å slå fast om rasfaren aukar. Døgnkontinuerleg overvaking, slik vi har det på Åkneset og på Mannen blir for dyrt for desse områda, seier Einar Anda.

Sjekk kartfakta om farlege fjell

Dette er dei fjella i Noreg som til no har vore mest aktuelle for overvaking. Dei fleste ligg i Møre og Romsdal. Men i Sogn og Fjordane ligg det største skredfarlege fjellet i Noreg. Også fjellskred i Nordnes og Kåfjorddalen i Troms kan få store følgjer.

Mannen er aller farlegast

Rapporten peikar ut fjellpartiet Mannen i Romsdalen som det aller farlegaste fjellområdet i Møre og Romsdal. Dette er dermed også det fjellområdet i Noreg der det er aller mest sannsynleg at det skal gå eit stort fjellskred. Skredet kjem til å fylle dalbotnen nedanfor med stein. Steinen kjem til å danne ein demning, og om demningen brest, kan det utløyse ei flodbølgje som gjer store skade nedover dalen mot byen Åndalsnes.

- Skulle eg ha satsa pengane mine på kvar vi får det neste store fjellskredet, så er det i fjellpartiet Mannen. Dette er det området der vi har definert den største sannsynlegheita for at det skal gå eit stort fjellskred, seier prosjektleiar Halgeir Dahle.

• Les også: Omfattande skadar om Mannen rasar
• Les også: Millioner til rassikring av Mannen
• Les også: Fjellet kan rase ut
• Les også: Kåfjord-fjell i bevegelse

Forbod mot å byggje sjukeheimar

Område som er klassifiserte med raud og gul trekant kan få følgjer for etablering av ny verksemd, om ikkje overvaking og varslingssystem kjem på plass. Skredfaren frå Opstadhornet var for eksempel ei medverkande årsak til at ilandføringsanlegget for gass frå Ormen Lange ikkje blei plassert i Haram.

– Dette området ligg utsett til om Opstadhornet skulle utløyse ei flodbølgje. Eit eventuelt skred med påfølgjande flodbølgje var også med i vurderinga, då Molde nye sjukehus blei planlagt høgt oppe på Eikrem. I Storfjordfjorden er overvaking og varsling på plass. Dermed er drifta ved institusjonen Muritunet, som ligg i vasskanten i Valldal, sikra, seier Dahle.