Strid om vegbygging

Ei gruppe innbyggarar startar ein kampanje for å prøve å stanse planane om veg opp på fjellet Rotsethornet, og meiner det vil øydelegge eit viktig naturområde.

Styreleiaren for Rotsethornvegen i Volda, Karl Erik Rønnestad, har inga tru på at ein underskripskampanje kan stoppe dei.

Har arbeidd lenge for veg

– Vi har gått grundig gjennom saka og den har vore grundig handsama i ei høyringsrunde i kommuneplanen. Så derfor trur eg ikkje prosjektet vert stoppa av ein underskriftskampanje, seier Rønnestad

Han har inga tru på at det markante fjellet i Volda sentrum i framtida berre vil vere for to- og firbeinte. Privatpersonar har i fleire år arbeidd med planane om å byggje veg opp på toppen av det 649 meter høge fjellet, og det er no laga ein privat reguleringsplan over området.

Håpar på vegstopp

Samstundes har motstanden vore hard, og Severin Helset, som bur like nedom Rotsethornet, seier ein slik veg vil øydeleggje eit viktig naturområde. Han håpar dei får stoppa planane.

– Om dei får bygd vegen vil det få store konsekvensar for utmarksområda i nærleiken av Volda sentrum, seier Helset.

For dei som ikkje kjem seg opp

Styreleiar Rønnestad seier målet framleis er å opne fjellet for dei som ikkje klarer å gå opp sjølve.

– Det å lage ein veg opp til eit fjell vil innebere at området ikkje vert akkurat slik som det var. Ein veg vil likevel gi nye mulegheiter til grupper som aldri har hatt høve til å kome seg opp tidlegare, seier Karl Erik Rønnestad.