Lærer femåringar å symje

Sidan tidleg i haust har femåringane i kystkommunen Herøy på Sunnmøre hatt symjeundervising.

- Heilt knall!

Berre halvparten av 10-åringane i Noreg kan symje, og satsinga i Herøy er unik i landssamanheng.

• Livsnødvendig opplæring
• Redd barn skal drukne

- Eg tykkjer det er gøy å symje og eg lærer det med ein gong, fortel fem år gamle Emilie Moen Karlsen frå vatnet.

Til hausten skal ho byrje på skulen og då vert det endå meir tid i bassenget. For i Herøy vert det satsa på symjeundervising frå siste år i barnehagen til og med 8. klasse i ungdomsskulen.

Symjeinstruktør Marianne Hammerø tykkjer det er kjempeflott at politikarane i Herøy har satsa på symjeundervising.

- Slik eg veit er det veldig sjeldan ein startar så tidleg med symjeundervising og vi er skikkeleg stolte av å få vere ein del av dette. Det er heilt knall!

Fornøgd ordførar

Born skal kunne symje ved utgangen av 4. klasse, står det i Kunnskapsløftet. Men manglande satsing i kommunane gjer at berre halvparten av tiåringane i landet er symjedyktige ifølgje Norges svømmeforbund.

• Bekymra for svømmeopplæringa

I Herøy kan så godt som alle tiåringer symje.

- Eg er veldig stolt av det når eg høyrer at vi kanskje er åleine om å gje eit fast

symjetilbod frå borna er fem år til dei går i 8.klasse, så er eg ganske fornøgd med det, seier ordførar Arnulf Goksøyr.

Hundrevis av born får symjeopplæring i Herøy fritidsbad kvar veke, og utanom skuletid kjem resten av folket. Siden åpninga i 2004 har årlieg besøkstall auka frå 25 000 til 50 000.

- Då har vi lukkast med det vi har satsa på, smiler ordføraren.

- Viktig for kroppen

Ein gong i månaden er barnehageborna i bassenget i kommunal regi. Det gjev eit godt grunnlag for å lære meir når dei byrjar på skulen.

- Vi ser at dei torer meir når dei vert trygge på å vere i vatnet, seier Monica Kvalsund, styrar i Trekløveren barnehage.

Og femåringane plaskar fornøgd i bassenget. Emma Rønnestad Moe har eit eige triks for å klare å flytei vatnet.

- Eg berre strekkjer meg ut og ligg heilt flat. Det er ikkje alltid eg klarer det, men eg klarer å stupe kråke i vatnet!

Satsinga på fritidsbadet har kosta også for Herøy, sjølv om det er stor velstand i kommunen gjennom fiskeri og offshoreverksemd. Bassenget er eit viktig bidrag til fritidstilbodet, og næringslivet har vore med på investeringane. Men drifta tek kommunen.

- Vi har strekt oss ein god del. Det er ikkje akkurat god butikk å drive med. Men det er god helsepolitikk, seier ordførar Goksøyr.

Og det er femåringen Jennie Kvalsund heilt einig i.

- Det er viktig for kroppen!

(NRK)