660 000 arbeidstimar fordelt på fem år har gitt resultat. I dag klipper samferdselsministeren snora som markerer opninga av Eiksundsambandet på Sunnmøre. 22.000 menneske i øykommunane Hareid, Ulstein, Sande og Herøy har fått fastlandsforbindelse. Prosjektleiar Oddbjørn Pladsen er fornøgd.
- Det er sjølvsagt ein stor dag for oss som har jobba med dette i fleire år. Og på ein måte skal det bli godt å overlate ansvaret til dei som skal halde vedlike prosjektet, seier Pladsen.
Vellukka prosjekt
- Vi meiner vi har gjennomført eit vellukka prosjekt. Vi har holdt oss innanfor budsjettet, og ingen har blitt alvorleg skadde, seier Pladsen.
Oddbjørn Pladsen har vore prosjektleiar for Eiksundsambandet. Her er han under bygginga av Eiksundbrua.
Foto: NRKOpphavleg kostnadsoverslag var på 995 millionar kroner, medan sluttkostnadane førebels er rekna til omlag 970 millionar kroner, noko som gir ei innsparing på 25 millionar kroner.
Verdsrekord
Eiksundsambandet består av den 405 meter lange Eiksundbrua og tre tunnelar. Den lengste, Eiksundtunnelen er 7,8 kilometer lang, og 287 meter djup. Det gjer den til verdas djupaste biltunnel. Men det er ikkje den einaste rekorden Pladsen har planar om å sette. Laurdag morgon blir det nemleg også arrangert sykkelritt i tunnelen.
Eiksundbrua er 405 meter lang.
- Det er søkt om godkjenning i Guiness-rekordbok for verdas djupaste sykkelritt. Så då kan vi kanskje kunne glede oss over to verdsrekordar, håper Pladsen.
Opning
Klokka 12 laurdag er den offisielle opninga av Eiksundsambandet. Då skal mellom anna samferdselsminister Liv Signe Navarsete klippe snora. Det blir festtalar, musikk og song. Klokka 12.45 er det buss- og bilkortesje, og klokka 14 opnar sambandet for ordinær trafikk.
